![](/staticfiles/news/237074/2024/07/05/823x463cc-semsur-ohd-tecrit-basvurusu1.jpg)
OHD semedê tecrîd ‘cayê ci de bêro cigêrayîş’ muracat kerd
- 14:09 5 Temmuze 2024
- NAROJANE
SEMSÛR - Avûkatê OHDyî semedo ke tecrîdê Îmraliyî “cayê ci de bêro cigêrayîş” muracatê Baroyê Semsûrî kerd.
18 avûkatê ke Baroyê Semsûrî de qeydkerde yê, serkêşîya Komeleya Huqûqnasê Semedê Azadîye (OHD) de seba Rayberê PKKyî Abdullah Ocalanî ke Zîndanê Tîpê Fyê Asayîşê Berzî yê Îmraliyî de tepişte yo û 40 aşmî yo xebere ci ra nîna girewtiş, muracatê baroyî kerd. Avûkatan verê awanîya xizmetî ya baroyî de eşkerayîye da.
Yûsûf Ozperçîno OHDyîj ard vîr ke Rayberê PKKyî Abdullah Ocalanî û tepişteyê bînî Hamîlî Yildirim, Omer Hayrî Konar û Veysî Aktaş yê ke Îmraliyî de yenê tepiştiş, xebere nîna girewtiş. Yusufî wina vat: “22yê çeleyê 2024ine de muracatê Wezaretê Edaletî amebî dayîş ke zîndan de cayê ci de cigêrayîşêk bêro kerdiş, rewşa tepiştişî ya bi endîşe peynî bibo û xêrcê tu sînordayîşêk bibo, pêvînayîşê avûkatan reyde bêro kerdiş. La wezaretî hema muracatî rê cewabê pozîtîfî nêdayo.” Yusufî bilew kerd ke ganî baroyî hemverê nê de bikewê têgêrayîş.
Waştişê cigêrayîşî
Avûkatan dimayê eşkerayîye waştişname dayî Baroyê Semsûrî. Waştişname de bale antî serê çalakîya ke tepişteyê sîyasî bi waştişê “Abdullah Ocalanî rê azadî, meseleya kurdî rê çareserî” dayê destpêkerdiş. Waştişname de ame dîyarkerdiş ke cewabnêdayîşê muracatê hemverê tecrîdî de yenê kerdiş, hemverê huqûqî yê. Waştişname de ame dîyarkerdiş ke cezayê dîsiplînî yê tepişteyan reyde ameyê dayîş teberê huqûqî yê û da zanayîş ke selahîyetdarî sûcê binpaykerdişê qedexeyê îşkenceyî kenê. Waştişname de ame waştiş ke baro şêro zîndan û cayê ci de cigêrayîş bikerê.