![](/staticfiles/news/238039/2024/07/23/823x463cc-van-23-07-24-evindar-akbulut-kurtce-kurs-manset.jpg)
Her wext û her cayî de kurdkî
- 11:28 23 Temmuze 2024
- NAROJANE
WAN - Îdarekara ARSÎSA Evîndar Akbulut, derheqê akerdişê kursê semedê tutan de wina vat: "Semedo ke ziwanê kurdkî nêro xovîrrakerdiş berpirsyarîyê sereyîn yê keyeyan oyo ke her wext tutanê xo reyde bi kurdkî qisey bikerê."
Keye, hem zî kuçeyan û hem zî mîyanê sazgehan de hemverê polîtîkayê asîmîlasyonî û xovîrrakerdişî têkoşînê şarê kurdî hema zî dewam keno. Wan de Komeleya Cigêrayîşê Ziwan, Kultur û Hunerî (ARSÎSA) dimayê destpêkerdişê betlaneyê hamnanî kursê newe akena, yew zî îdarekara ARSÎSAyî Evîndar Akbulut derheqê kursê ke do tutan rê abikerê ajansê ma JINNEWSî rê qisey kerd.
Evîndare sere de wina vat: "Şima zanê tutî ameyoxê ma yê û tutê ma roj bi roje bi ziwanêk xerîbî rê girêdaye benê û kurdkî xo vîr ra kenê. Semedê nê zî ma wazenê ziwanê kurdkî bibo ziwanê fermî. Çi heyf no waştiş ca nîno. Ma sey sazgehê ziwanê kurdkî kursan zî akenê û bi taybetî semedê tutan ma wazenê sinifan abikerê. Ma kursan akenê ke tutî zêdeyêr bi ziwanê xo yê dayîke girêdaye bibê, bi kurdkî qisey bikerê û bi kurdkî biciwîyê."
'Tutê 8 û 15 serrî kursan de ca gênê'
Evîndare dewam de wina vat: "Ma tutê 8 serre qebûl kenê, semedo ke wendiş zanê. Musayîşê wendiş û nuştişî yê tutanê qijan tewr zehmet o. Coka ma tutanê 8 serrî reyde dest bi kursê xo kenê. Semedê nê zî zehmet nîyo. Helbet yê ke kurdkî zanê zî est ê. Ma çîyanê rojane yê sey reng û herfan musnenê ke cuya rojane de qisey bikerê. Bi no hawa, înan rê hîna asan beno û ê eşkenê tewr asan qisey bikerê û xo îfade bikerê."
'Qiseykerdişê kurdkî de israr bikerê'
Evîndare tesîrê ziwanî wina vat: "Qiseykerdişê bi kurdkî, serê tutan tenê de nê, serê pîlan de zî keno. Qiseykerdişê tirkî beno sebebê dûrmendişê ziwanê xo û na rewşe bena sebeb ke merdimî nêeşkê xo rast îfade bikerê. No çî beno sebebê bêmoralî. Coka lazim o ke her ca de kurdkî qisey bikerê. Çend kesê hemverê ma bi ziwanêk cîya qisey bikerê zî ganî ma ziwanê xo de israr bikerê û qisey bikerê."
'Ma venga musayîşê kurdkî kenê'
Evîndare tewr peyîn wina vat: "Ez venga pêro şarê tîya kena, Wan de her dem û her ca bi kurdkî qisey bikerê, bi kurdkî binusê, bi kurdkî kay bikerê û bi kurdkî biciwîyê. Kursê ma yê semedê tutan nika dest pêkenê û ma qeydan gênê. No hewte de ders do dest pêbikero. Ma wazenê tutî, keyeyê înan û pêro şarê ma bi waştişê musayîşê ziwanê kurdkî bêrê û dest bi kurs bikerê.”