Gulîstan Gulmuş

 

DÊRSIM - 22ine Festîvala Kultur û Xozaye ya Mûnzûrî ke emser Dêrsim de yena organîzekerdiş, siba dest pêkena. Hemşaredara Dêrsimî Bîrsen Orhan derheqê festîvale de wina qisey kerd: "Semedê vindarnayîşê polîtîkayê şerê taybetî ganî ma nê bajarî bipawê."

 

Dêrsim de emser zî do 22yîn Festîvala Kultur û Xozaye ya Mûnzûrî yena organîzekerdiş. Festîvala ke  do 4 rojî dewam bikero, do xeylêk bername bêrê organîzekerdiş. Festîvale bi sloganê “Ma do destûr nêdê desteserkerdişê xoza û îradeyê ma” mabêne 25-26-27-28ê temmuze de pê yeno. 

 

Derheqê festîvale de Hemşaredara Dêrsimî Bîrsen Orhan ajansê ma rê qisey kerd û venga tewrbîyayîşê welatijan kerd. 

 

Festîvale do 4 rojan dewam bikera

 

Bîrsene, wina vat: "Dêrsim wayîrê taybetmendîyêk o û bi kultur, xoza û bawerîya xo. Bernameyê ke do 4 rojan dewam bikerê, ameyê amadekerdiş. Roja destpêkê festîvale ra heta ewro hewldayîşêk nasnayîşê Dêrsimî, xozaya Dêrsimî est o. Sewbîna ma hewl danê ke kultur û xozaya Dêrsimî bipawê. Çîyê ke dinya û Tirkîya est ê Dêrsim zî para xo girewt. Amancê festîvale yew zî berzkerdişê vengî yo û xo nasnayîşî yo."

 

Xebatêke kollektîf

 

Bîrsene, dewam de wina vat: "Bi qedexe û astengîyan hewl danê festîvalan werte ra wedarnê û kombîyayîşê girseyan asteng bikerê, paştdayîşî werte ra wedarnê. Çi heyf xeylêk festîvalî benê sebebê lêşinîyê derûdorî la ma zanê ke welatijê ma zanaye yê û do wayîrê xozaya xo vejîyê. Semedê plansazîyê festîvale ma bi heme sazgeh û dezgehê bajêrî de kom bî. Semedê paketa tasarûfî ma bi kollektîfî plansazîyê bernameyan kerd."

 

'Xoza bipawê'

 

Bîrsene, tewr peyîn venga tewrbîyayîşê welatijan kerd û vat: "Sewbîna ma esnafanê bajarî ra wazenê ke çîyan vay nêroşê. Sewbîna ganî welatîjî hemverê xoza zî hişyar bê û bipawê.”