Gulîstan Gulmuş

 

DÊRSIM - Şikdaro bi nameyê Cahît Kiray ke Dêrsim de desteştiş cinîya ke mînîbuse rê espar bîbî kerd, dimayê hedîse ame destbendkerdiş û dimayê rojêke ame veradayîş. Ayşe Cîhangîr ya desteştiş ci rê ame kerdiş wina vat: “Semedê polîtîkaya bêcezayî beno ke ez ancî ey reyde bêrî rî bi rî û eşkeno çîyê bînan zî bikero. Xeylê cinîyê ke nê çî ciwîyenê est ê.”

 

Dêrsim de camêrdo bi nameyê Cahît Kiray, mînîbuse de desteştişê cinîya bi nameyê Ayşe Cîhangîr (23) ya şîne mektebe kerd. Ayşe ke hem bi tacîzê fîzîkî û hem zî yê vatişî reyde ameye rî bi rî, çîyê ke cuya JINNEWSî rê qal kerd.

 

Pawitişê cewherî şuxilna

 

Ayşe da zanayîş ke semedo ke bikewo îmtîhan şîya mektebe û hetê camêrdê ke nas nêkena ra ameya   tacîzkerdiş. Ayşe wina vat: “Bi bedenê xo nêzdîyê mi ame. Ez nêrehet bîya. Mi nêrehetîyê xo qal kerd. Ma munaqeşe kerd. Dimayê nê gamek şi û heqaret kerd. Mi vat, mi ra dûr bikewe û mi rê heqaret kerd. Serê cil û belganê mi de heqaret kerd. Mi şoforî ra vat, ‘şima çira kesê winasî gênê wesayît’. Mi zî vat, ‘tu merdiman nêrehet kenê, tacîz kenê’. Munaqeşe dewam kerd. Heqeret mi rê kerd. Kulmî dayî mi ro. Mi zî pawitişê cewherî kerd û kulme da piro. Şîdet dewam kerd. Kesî reaksîyon nêmojna. Kesî vernî panêda. Ez şîya emniyet û mi gerre kerd.”

 

Şewêke destbendkerde mendo!

 

Ayşe dewam de wina vat: “Serê mi de travmayêk awan kerd. Ma çend saetî emniyet de mendî. Fotografê ê şikdarî ame. O şexs bi. Qeydê sûcê ey zî estbî. Pêwa nê demêk derg ey nêvînayî. Dima ra mi muracatê baroyî kerd. Ez ancî şîya emnîyet. Şikdar ameyo destbendkerdiş la şewêke mendo û vera dayê. Dosya şîya dozgerî. Beno ke ez ey reyde bêrî rî bi rî û polîtîkaya bêcezayî ra eşkeno muracatê çîyê bînan zî bikero. Xeylêk cinîyê ke nê çî ciwîyenê est ê.”

 

Ayşe tewr peyîn vat, Dêrsim de hedîseyê winasî xeylê est ê û wina qedêna: “Hîrê serrî yo ez Dêrsim de ciwîyena. Xeylêk hedîseyê winasî yenê ciwîyayîş. Nê nimûneyan ra yewe zî Gulistan Doku ya. La hewl yeno dayîş serê nê hedîseyan bêro padayîş.”