Gulistan Gulmuş

 

AMED- Dayîka tepişteya nêweşe Şîvekar Ataş, Rabîa Ataş bale ant serê muhîmîyê vengdayîşê Rayberê Şarê Kurdî Abdullah Ocalanî û va: “Ganî serek û tepişteyê nêweşî bêrê veradayîş. Ma aştîyêke bi edalet wazenê.”

 

Vengdayîşê ‘aştî û komelê demokratîkî’ yê Rayberê Şarê Kurdî Abdullah Ocalan ke 27ê Sibate de deklere kerd ser o du aşmî derbaz bî. Nê prosesî de pêwa ke tay pêvînayîşî amebî kerdiş zî hema selahîyetdarê dewlete gamê somutî nêeştê, tecrîdo giran dewam keno.

 

Dayîka tepişteya nêweşe Şîvekar Ataşa 9 serrî yo zîndanê cinîyan ê Bakirkoyê Stenbolî de tepişteya, Rabîa Ataş derheqê prosesî de û bendewarîyê xo de qisey kerd. 

 

‘Pêwa nêweşîyê înan giran ê moral danê ma’

 

Rabîa Ataş dîyar kerd ke nêweşîyê kênaya aye Şîvekar Ataş dewam kenê û va: “Wexto ke qalê prosesê aştî yeno kerdiş, moral danê ma. Vanê ke  do her çî weş bibo, na do bêrê keyeyê xo. Ma hêvî kenê ke no proses baş derbaz bibo. Pêwa nêweşîya înan yê giranî moral danê ma. Kênaya mi semedê nêrehetîyê qelbî 20 rojan ra reyke derzenî dana xo ra. Semedê nêweşîya cinîyan emelîyat bî. Hêvîdar a na nêweşî newe ra rî nêdo. Verê zî semedê nêweşî xeylêk problem ciwîya. ÎHD zaf serde vindert û amelîyat bî.”

 

‘Serek vajo çi ma paştdayîş danê’

 

Rabîa Ataş dewam de wina va: “Rayberê Şarê Kurdî game eşt. Gelo dewlete çiqas zerrî ra. Ma vanê gelo no komployêk o, ma xapênenê. Kênaya mi tepişte ya, yew zî gerîla ya. Ma wazenê dewlete gaman bierza. Serekê ma vajo çi ma paştdayîş danê. DEM Partî, Wezaretê Edaletî dir pêvînayîş kerd. Ma hemverê tecrîd û semedê aştîye çalakîya nobete pê ard. La dewlete cewabêk nêda. Nê semedî ra bawerîya ma nêmenda. Ganî dewlete lezkî gamêke bierzo. Ganî fek hêrişan ra vera bido û aştîyêke bi edalet bibo.”

 

Şîvekar Ataş kam a?

 

Şîvekar Ataş dewa Agaçlidere ya Sûrê Amedî de amî dinya. Keyeyê aye semedê tedayê dewlete serra 90î de koçê Amedî kenê. Şîvekara ke muhendisîya kompîturî wendêne, 2016ine de Mûş de tepişya û berdî zîndanê Tarsusî, badê zî Sîncan û nika zî Bakirkoyê Stenbolî de ya. Bi îdiayê endamîya rêxistine 15 serrî ceza ci rê amî birnayîş. Şîvekare li hemverê tecrîdî, zîndan de hîrê rey kewte grev. Şîvekare nêweşa giran a qelbî, tansîyona berzî û rehmê de kîst est ê. Pêwa nê nêweşîyanê giranan tepişte ya.