ŞIRNEX - Sazgehê Ziwanê Kurdî û platformê Kede û Demokrasî yê Şirnexî bi eşkerayîyêke startê çalakîyê 15ê Gulanê Roşanê Ziwanê Kurdî da û eşkerayî de ame dîyarkerdiş ke heta ziwanê kurdî bibo ziwanê perwerdeyî û fermî do têkoşînê xo dewam bikerê.

 

Bi serkêşîya Komeleya Ziwan û Kulturî yê Birca Belek û Cûdî Derî, startê 15ê Gulane Roja Roşanê Ziwanê Kurdî verê awanîya Partîya Têduştî û Demokrasî (DEM Partî) ê Şirnexî bi eşkerayîyêke ame dayîş. Platformê Kede û Demokrasî yê Şirnexî, parlamenter Mehmet Zekî Îrmez û xeylêk kesî tewrê eşkerayîye bîyî. Eşkerayîye de pankartê ke ser de, “Statuyê Kurdî perwerdeyê bi Kurdî” nuştêne, ame girewtiş.

 

Metnê eşkerayîye hetê endamê Komeleya Ziwan û Kulturî yê Bircabelekî Cahît Akıl ra ame wendiş. Cahît Akilî wina va: “Eke ez nêeşkî bi ziwanê xo yê dayîke qisey bikerî, eke tutê mi nêeşkê ziwanê dayîke bimusê, o wext çi manaya cuya mi manena? Yê ke qeyd û kelepçe ziwanê înan rê dîyayo piro, mezgê ci, ewnîyayîş û zerrîya ci rê qeyd û kelepçe ameyê pirodayîş. Ma sey şarê kurdî, se serre yo zêdeyêrî nê dejî ancenê. Emser bi wesîleya 15ê Gulane Roşanê Ziwanê Kurdî ma bi şiarê Statuyê Kurdî perwerdeyê bi kurdî meydanan de yê. Ma do kuçe bi kuçe, tax bi taxe, bajar û dewanê xo pawitiş û averşîyayîşê ziwanê kurdî bikerê. Ganî statuyê ziwanê kurdî bêro naskerdiş, ziwanê kurdî bibo fermî. Pêşdibistan ra heta unîversîte ganî perwerdeyê ziwanê kurdî bibo û bi qanûnê bingehîn heqê şarê kurdî bêro qetîkerdiş.

 

Eşkerayîye bi berzkerdişê sloganê, “Ziwanê ma rûmetê ma yo” û “Bêziwan cuye nêbeno” peynî bî.