MERKEZÊ XEBERAN - Tepişteya sîyasî ya bi nêweşîya MSî Fateme Ziyaei ke Zîndanê Evîne de yena tepiştiş, pêwa girankerdişê rewşa weşîya xo zî nîna dermankerdiş.

 

Dewaya tepişteya sîyasî Fateme (Huriye) Ziyaei Azad, 10ê teşrîna peyêne de, Şaxa 15ine ya Dadgeha Şorişî ya Tehranî ame dîyayîş. Fateme Ziyaei ya 66 serrî, ke Zîndanê Evîne de yena tepiştiş, pêwa problemê weşîye girdî zî nîna dermankerdiş.

 

Goreyê xebera NûJINHAyî, ronîştişî de Fateme Ziyaei “propagandayê hemverê rejîmî”, “komkerdiş û komployê hemverê asayîşê welatî” û “endambîyayîş komê muhalifê rejîmî de” sûc ameyî tawanbarkerdiş. Fateme Ziyaei, ronîştişî de hemverê nê tawanbaran xo pawit.

 

Nêweşa MSî 

 

Fateme Ziyaei, 6ê tebaxe de, keyeyê xo yê Tehranî hetê yewîneyê asayîşî yê girêdayeyê Wezaretê Îstixbaratî ra amebî destbendkerdiş. Semedo ke Fateme Ziyaei bi nêweşîya MSî ya, wextê tepiştişî de nêresnayîşê aye yê ewnîyayîşê doktorî, derûdorê heqê merdiman de bi endîşe yeno qebulkerdiş. Fateme Ziyaei, verê zî semedê çalakîya xo yê sîyasî ameya muhakemekerdiş û cezaya tepiştişî girewtebî, bi serran o azadîya fikrî û heqê cinîyan ê Îranî rexne kena.