STENBOL - Zelal Kiliç ke dardekerdişê aye di rey amebî astengkerdiş, Zîndanê Cinîyan ê Girewte yê Bakirkoyî ra ameye veradayîş.

 

Zelal Kiliç ke serra 2015ine de bi tohmetê "endamîya rêxistine" Stenbol de ameye tepiştiş, pêwa ke cezaya xo ya 9 serrî û 6 aşmî yê zîndanî temam kerdebî, semedê di qerarê pê dima yê semedê peysereştişê veradayîşê aye, nêamebî veradayîş. Zelal Kiliç ewro Zîndanê Cinîyan ê Girewte yê Bakirkoyî ameye veradayîş.

 

Zelal Kiliç teberê zîndanî de hetê keyeyê xo, aktivîstê Têgêrayîşê Cinîyanê Azadan (TJA), endamê Komeleya Marmarayî yê Hetkarî û Piştîdayîşî bi Merdimê Tepişteyan û Mehkûman (MATUHAY-DER) û xeylêk cinîyan ra ameye pêşwazîkerdiş. Cinîyan bi vilan Zelal Kiliç pêşwazî kerd; kevokê ke xo dir ardibî zî ver bi asmênî pernayî.