MERKEZÊ XEBERAN- Rêxistina Heqanê Merdiman a Îranî eşkera kerd ke encamê hêrişanê Îsraîl û Amerîka de hetêkê dêsanê Hepisxaneyê Evînî rijîyayo û dîyar kerd ke rewşa girewteyan ser o ê nêeşkenê agahîyan bigîrê.

 

Rêxistina Heqanê Merdiman a Îranî eşkera kerd ke nê serê sibayî Amerîka û Îsraîl Hepisxaneyê Evîn ê Tehranî û derûdorê Unîversîteya Îmam Hisênî bombabaran kerdo. Ame vatene ke encamê hêrişî de hetêkê dêsanê hepisxaneyî rijîyayê.

 

Derheqê zeraranê hêrişî de zî rêxistine dîyar kerd ke heta nika tu agahîyêk hûmara qurbanîyanê hêrişî de nêameya vilakerdene û no zî fikaranê girdan keyeyan ser o virazeno.

 

Sewbîna ameyo eşkerakerdene ke roja destpêkî ya şerî ra rewşa awarte Hepisxaneyê Evînî de ameya eşkerakerdene,  xebatkarê hepisxaneyî cayê xo de nêmendê, berê hepisxaneyî girewte mendê û girewteyî, rewşêka zehmet û tehluke ciwîyenê.