Nazlican Nûjîn Yildiz

 

ÎZMÎR - Hemsereka EGE-TUHAYDER’î Ayfer Yildirim da zanayîş ke pêwa prosesî binpaykerdişê heqê zîndanî dewam kenê û va yewine waştişê merdimê tepişteyan û keyeyan azadîya Rayberê Şarê Kurdî Abdullah Ocalan û tepişteyê sîyasîyan o.

 

Vengdayîşê “Aştî û Cimatê Demokratîkî” ke Rayberê Şarê Kurdî Abdullah Ocalanî 27ê Sibata 2025ine de kerd yew serre derbas bî. Seranserê serre averşîyayîşê cîya ameyî cuyayîş labelê rojeva esasî ya şarî azadîya Rayberê Şarê Kurdî Abdullah Ocalan û tepişteyê sîyasî û tepişteyê nêweşan bî. Labelê pêwa prosesî binpaykerdişê heqan dewam kenê.

 

Hemsereka Komeleya Piştîdayîş û Hetkarîya Keyeyê Tepişteyan a Egeyî (EGE-TUHAYDER) Ayfer Yildirim da zanayîş ke binpaykerdişê heqî û tecrîdê zîndanî dewam keno û eşkera kerd ke ganî sere de Rayberê Şarê Kurdî Abdullah Ocalan û heme tepişteyê sîyasî biresê azadîya fîzîkîya xo.

 

‘Zîndan de zextî zêde benê’

 

Ayfer Yildirim dîyar kerd ke venga “Aştî û Cimatê Demokratîkî” şarî de hêvîyêka pîl awan kerd û wina va: “Nê prosesî de temsîlkarê sîyasî û sazgehê demokratîkî semedo ke proses rast neql bikerê kedêka pîl dayî û dewam kenê. Wareyo ke ma eleqedar keno raste rast zîndan o. Zextê  tepişteyan ser o her ke şinê zêde benê. Her tewirê şîdetî bi taybetî yê psîkolojîkî xeylêk zêde yo. Problemê ekonomî yenê ciwîyayîş. Nika prosesêk est o û no bi kombîyayîşan yeno vatiş, proses yeno neqlkerdiş. Eke têduştîyêk bêro awankerdiş ganî ewil dewlete babeta tepişteyan de keyeyê tepişteyan de game bierzo. Keye û tepişte nê wazenê. No proses heme şaran eleqedar keno. Semedê awankerdişê aştîyêke bêro ganî zerrî ra bibo.”

 

‘Semedê tepişteyanê nêweşan ganî hewldayîşêk taybetî bibo’

 

Ayfer Yildirim bale ant ser tecrîda tepişteyan û wina dîyar kerd: “Tecrîd hema est o û giran beno. Goreyê agahî proseso peyên hîna bi xofêr o. Hem hetê psîkolojîk hem hetê ekonomî de. Xeylê tepişteyî problemê ekonomî ciwîyenê. Xeylê keyeyê înan tîya nîyê. Keyeyî wazenê pere bişirawê labelê no zî sûc yeno hesibnayîş. Her tewir binpaykerdişê heqe yeno ciwîyayîş. Tecrîd tenya Birêz Ocalanî ser o nê, heme tepişteyan ser o est o. Şarê Tirkîya ser o tecrîd est o. Ma veng danê ke îqtîdar goreyê huqûqê gerdunî têbigêro. Ganî semedê tepişteyanê nêweşan hewldayîşêk taybet bibo.”

 

‘Ganî sere de Birêz Ocalan û heme tepişteyî azad bê’

 

Ayfer Yildirim wina peynî ard: “Heqê hêvîye semedê heme tepişteyan muhîm o û ganî bêro caardiş. Eger behsê aştî û têduştîye kenê, behsê Komara Demokratîkî bikerê no wina nêbeno. Waştişê ma oyo. Ganî heme tepişteyê sîyasî bêrê veradayîş, Semedê Birêz Abdullah Ocalanî azadîya fîzîkî bêro caardiş. No waştişê ma zaf zelal o. Ganî Birêz Ocalan û heme tepişteyî azad bê. Ma aştîye de bi israr ê. Ma vanê aştî û demokrasî. Hewcedarîya ma bi edalet û aştîye est a. Waştişê şarî zî no yo ke lezkî tepişteyê sîyasî azad bê.”