Rojda Aydin

 

AMED - Vejîya orte ke wayîrê şîrketê ZENKAR-1î Muzaffer Aslanhan ke wazeno santralê enerjîya tîjî (GES) dewa Arzoxlî de virazo, îdarekarîya AKP’yî ya Amedî de ca gêno. Sewbîna ame îdiakerdiş ke mabêne Muzaffer Aslanhan û Walîyê Amedî Murat Zorluoglu de têkilîyêk nêzdî est a.

 

Babeta wêrankerdişê derûdorî nê serranê peyên de raya pêroyî ya Tirkîya de bîyo yew babeta tewr zêde yena munaqeşekerdiş. Wêrankerdişê derûdorî, bi taybetî yê semedê xebatê madenî, projeyê enerjî, vurnayîşê herêman û veberhênanê binesazî yê pîlan, xeylêk reyan munaqeşeyê hesabdayîşê sîyasî xo dir anê. Na çarçeweya de, ê kesê ke bi têkilîyêk xo yê nêzdî AKP’yî dir yenê nasnayîş, bi domnayîşî sey pey wêrankerdişê derûdorî yê plankerdiş û plankerde vejênê vernî.

 

Dewa Arzoxlî ya qezaya Sûrî ya Amedî, Şîrketê ZENKAR-1 wazeno ke santralê enerjiya tîjî (GES) virazo. Reaksîyonê roniştoxê dewe hemverê nê projeyî de dewam kenê. 3yê Adare de kepçeyê şîrketî pêwa cendirmeyan şîyî dewe ke dest bi xebate bikerê. Labelê reaksîyonê roniştoxê dewe ser o, cendirmeyan caardişê gazê îsotî û awe şidî mudaxele kerd. Demê hêrişî de, xeylêk kesî, pêwa cinîyê ke çalakî viraştî, bi kuyayîşî ameyî destbendkerdiş.

 

Wayîrê şîrketî û têkilîyê ey yê AKP’yî dir

 

Goreyê agahîyê ke ameyî bidestkerdiş, yeno vatene ke wayîrê şîrketê ZENKAR-1 Muzaffer Aslanhan endamê îdarekarîya AKP’yî ya Amedî yo. Sewbîna yeno îdiakerdiş ke mabêne Muzaffer Aslanhan û Walîyê Amedî Murat Zorluoglu de têkilîyêk nêzdî est a. Hesabê medyaya dîjîtalî de fotografê wayîrê şîrketî Muzaffer Aslanhan û Walî Murat Zorluoglu pîya girewtê zî est ê.

 

Yeno îdiakerdiş ke semedê nêzdîbîyayîşê herdi hetan nê hêrişî û şîdetî roniştoxê dewe rê ameyî kerdiş.