Rabîa Onver

 

AMED - Aktîvîsta TJA’ye Nurten Uzumcu da zanayîş ke bi averşîyayîşanê dosyaya Gulistan Dokû de vatişê “xokiştişî” bêmana mendê û nimûne Rojwelat Kizmaze ya Êlih de dinyaya xo bedelnaye, ard vîr. Nurten Uzumcu da zanayîş ke ganî cigêrayîşêk bi tesîr bêro domnayîş û failî bêrê vînayîş û muhakemekerdiş.

 

Dimayê averşîyayîşanê dosyaya Gulistan Dokû de, waştişanê semedê dosyaya bi nê rengî zî zêde bî. Nê averşîyayîşan ser de keyeyê Rojwelat Kizmaz muracat kerd û waştişê cigêrayîşêk bi tesîr kerd.

 

Aktîvîsta Têgêrayîşê Cinîyan ê Azadan (TJA) ra Nurten Uzumcu derheqê mergê bi guman ê Rojwelat Kizmaze de qisey kerd û da zanayîş ke hedîseyê şîdetî, qetilkerdiş û desteştî yê hemverî cinîyan munferît nîyê û va: “No sîstem wazeno cimatê xo goreyê xo form bikero û na yewe zî cinîyan ser de awan keno. Hemverê nê de bêguman têkoşîn û îradeyê cinîyan est o. Cinî û cimat binê hêrişêk sîstematîk de yê. Bi taybetî hemverê cinîyanê kurdan, hêrişêk sîstematîk têkoşînê cinîyanê kurdan ser o est o.”

 

‘Ganî dosya sey cînayet bêro ercnayîş’

 

Nurten Uzumcu destnîşan kerd ke averşîyayîşê dosyaya Gulistan Dokû de îdîayê “xokiştişî” bêmana mendo û va: “Ma eşkenê vajê ke no cînayet o. Coka ma wazenê ke heme dosyayî bi nê rengî înan ser de gumanê xokiştişî est o, newe ra bêrê akerdiş, gumanbarî bêrê muhakemekerdiş û cezakerdiş. Dosyaya Rojwelat Kizmaze zî na çarçeweye de ganî bêro cigêrayîş. O wext cigêrayîşêk xurt û cipersayîşêk xurt nêame kerdiş. Ganî gumanbarî bêrê vînayîş û bêrê muhakemekerdiş.”