STENBOL - Înîsiyatîfê Dayikanê Aştîye yê Stenbolî derheqê Rahmî Koçî de gerre kerd. Dayikan da zanayene ke ey efû waşt labelê kurdan ra nêwaşt û wina va: “Heta ke cinîyanê kurdan ra efû nêro waştene, ma efûyê ey qebûl nêkenê.”

 

Vera vateyanê Rahmî Koçî yê nîjadperestan nêrazîbîyayîşê şarê kurdî domîyeno. Stenbol de Înîsiyatîfê Dayikanê Aştîye yê Stenbolî seba vateyanê ey ê zayendperestan derheqê Rahmî Koçî de gerre kerd. Dimayê gerrekerdişê dayîkan verê Edliyeyê Stenbolî yê Çaglayanî de eşkerayîye da. Endamê Şubeyê Komeleya Huquqnasê Semedê Azadîye (OHD) ya Stenbolî, îdarekarê DEM Partî û HDKyî yê Stenbolî û zaf welatijî tewrê eşkerayîye bîyî.

 

Dayîka Aştîye Bedîa Gokoze dîyar kerd ke ewro ê vera heqaretê Rahmî Koçî nê wareyî de yê û wina va: “Rahmî Koçî efû waşt labelê kurdan ra nêwaşt. Wextê ke heqaret kerd, kurdan rê kerd labelê wextê efûwaştene de behsê kurdan nêkerd. Heta ke cinîyanê kurdan ra efû nêro waştene, ma efûyê ey qebûl nêkenê. Ma dayîk ê û serberz ê. Ma bi şîdet Rahmî Koçî şermezar kenê. Çi ceza heq keno, ganî ey rê bêro birnayene. Ma bi laçikê xo yê sipî tîya yê. Ganî şarê kurdî fîrmayanê Koçî boykot bikero.”

 

Dayîka bi nameyê Ayten Toprake zî ard ziwan ke ê nê heqaretî qebûl nêkenê û wina qisey kerd: “Wextê ke heqaret ame kerdene, ê ke uca de huyayî zî ganî efû biwazê. Ê kesû ke vera nê vateyî nêvindertî şermezar kenê. Ma sey cinî nê heqaretî qebûl nêkenê. Ma bi serran o bi rûmet ciwîyenê. Cinî her wext serê lingan de yê.”

 

Eşkerayîya dayîkan bi sloganê ‘Jin Jiyan Azadî’ peynî bî.