WAN - Temsîlkara Komeleya Cinîyanê Starî avûkate Zeynep Demîr derheqê hêrîşê hemverê heqê nefeqeyî de qisey kerd û va ke wazenê dimayê welidyayîşî cinîyan feqîr bikerê û va: “Vera ke mekanîzmayê ke ganî cinîyan feqîrîye ra vejê bêrê awankerdiş, cinîyan binê ablûqaya şîdetî de verdenê.”

 

Reaksîyanê hemverê betalkerdişî yê serrastkerdişê nefeqeyê feqîrîye ke Qanûnê Medenî yê Dadgeha Desturê Bingehênî (DDB) de ca girewtibî dewam kenê. Qerarê ke 9 aşmî dima do bikewê merîyet, sey parçeyêk polîtîkaya ke asayîşê ekonomîkî yê cinîyan hedef gêno yeno ercnayîş.

 

Îdarekara Komeleya Cinîyan û avûkate Zeynep Demîr derheqê qerarê nefeqeyî de qisey kerd.

 

‘Prosesê destverdayîşî de piştîdayîş nêdanê cinîyan’

 

Zeynep Demîr reaksîyon vera betalkerdişî yê nafaqeya feqîrîye û va ke prosesê destverdayîşî de cinî hetê ekonomî û komelî de tena yenê verdayîş û cinî zafê reyan têkoşînê cuye danê. Zeynep Demîr wina ard ziwan: “Dimayê qerarê destverdayîşî mekanîzmayê komelî nêkewenê dewre. Piştîdayîşê semedê cinîyan çin o.”

 

‘Keda cinîye û feqîrî nînê dîyayîş’

 

Zeynep Demîr eşkera kerd ke prosesê destverdayîşî de yê ke tewr zaf tesîr benê cinî yê û zewacî dir cinî cuya xebatî ra dûr kewenê û heme barê keyeyî û yê tutan cinîyan ser o maneno. Zeynep Demîr va ke keda cinîye û feqîrîya cinîye nîna dîyayîş.

 

‘No qerarê şîdet giranêr keno’

 

Zeynep Demîr bale ant qerarê DDByî yê nefeqeyî û va ke no qerar do şîdetê ekonomî û fîzîkî zî zêde bikero û xeylê cinî semedê ke derûdorê şîdetî ra bivejê qerarê destverdayîşî gênê, la dimayê destverdayîşî piştîdayîşêk rind û bes nêvînenê, ver bi cuyêka bêasayîşî şinê. Zeynep Demîr wina qedêna: “Semedo ke cinî derûdorê şîdetî ra bivejê ganî mekanîzmayê dewlete yê komelî bêrê xurtkerdiş. Ganî polîtîkayê îstîhdamî bêrê averberdiş, kreşî bêrê akerdiş û îmkanê perwerdeyê meslegî bêrê dayîş. Vera ke mekanîzmayê ke ganî cinîyan feqîrîye ra vejê bêrê awankerdiş, cinî ablûqayê şîdetî de verdenê.”