Devrîm Findik

 

STENBOL - Asiye Kolçak û Burcu Çelîk yê ke “Konferansê Vurîyayîşê Komara Demokratîke” de qisey kerdî û dîyar kerdî ke ganî polîtîkayê înkarî peynî bibê û vatî ke Komara Demokratîke bi tewrbîyayîşê cinîyan, ciwanan û hetê komelî eşkena bêro awankerdiş, aştî zî bi asayîşê hemwelatîbîyayîşê têduştî û asayîşê desturê bingehênî mumkin a.

 

Çareserîya demokratîke ya problemê kurdî, dorê sernameyê hemwelatîbîyayîşê têduştî, azadîya cinîye û aştîya komelî de yena domnayîş û 13-14ê hezîrane de Stenbol de “Konferansê Seserra 2yine de Vurîyayîşê Komara Demokratîke” Merkezê Kulturî yê Cem Karacayî de pê ame.

 

Konferanso ke di rojan dewam kerd, hunermend, akademîsyen, sîyasetmedar, aktîvîstê cinîyan, temsîlkarê sazîyê komela demokratîkî tewrê ci bîyî û zaf meseleyî ameyî ercnayîş.

 

Endama PMyî ya Partîya Têduştî û Demokrasîyê Şaran (DEM Partî) Asiye Kolçak û verfeka Înîsiyatîfê Hemverê Merdişanê Rêzdarî û Edaletî, Burcu Çelîk yê ke tewrê konferansî bîyî qisey kerdî.

 

‘Ganî înkarê seserre ra bivejîyê’

 

Asiye Kolçak va ke ganî heme heyê komelî derheqê çareserîya problemê kurdî de vatişê xo vajê û ganî prosesê aştîye de destanê xo bikerê binê kerra û wina va: “Seserra peyêne de semedê polîtîkayê bêdemokratîkî cîyakerdişî ameyê kerdiş. Seserrêke bîne bi polîtîkayê asîmîlasyonî nêşinê. Ganî nê înkarê seserrî ra bêro vetiş. Ganî heme nasnameyî bêrê naskerdiş û biresê asayîşê desturê bingehênî. Vatişê ‘Kurdî wayê û birayê ma yê’ aştî nêano.”

 

‘Wa bibo wesîleya destpêkêk newe’

 

Asiye Kolçak va ke ganî heqê cinîyan, ekonomî, heqê heywanan prosesê aştîye de bêrê çareserkerdiş û wina va: “Semedo ke mesajê cidî yê nê konferansî rayepêroyî rê bêrê neqlkerdiş ma ameyî tîya. Hêvîya ma na ya ke no konferans bibo wesîleya destpêkêk newe. Ziwanê kuçeyî nîşaneyê somutî yê krîzê dîzaynkerdişê îqtîdarî yo. Kuçe de teqîyayîşêk komelî yeno ciwîyayîş. Semedo ke vernîya nê bêro girewtiş ganî dest fehmê înkarî yê seserra bêro verdayîş. Kurdî û nasnameyanê bînan ê welatî yê ke çin ameyî hesabkerdiş awankerdoxê esasî yê welatî yê. Ez wazena xo welatê xo de azad hîs bikerî.”

 

‘Ganî hewcedarîyê esasî bêrê qalkerdiş’

 

Burcu Çelîk derheqê hewcedarîyê konferansî de qisey kerd û bale ant averşîyayîşanê dimayê 2015ine û wina dewam kerd: “Wedaritişê destnêdayîşî, tepiştişê sîyasetmedaran, tayînkerdişê qayûman, polîtîkayê zordarîye yê cinî, ciwan û cimatî set. No tesîrêk pîl şarî ser o kerd. Ewro prosesêk newe yeno munaqeşekerdiş. La hetê klasîkî de no sey prosesê aştîye nêşeno bêro pênasekerdiş. Bi serran zordarî û hêrîşê kurdan ser o yenê munaqeşekerdiş. La tecrubeyê verênî zêde ganî hewcedarîyê esasî bêrê qalkerdiş.”

 

‘Bedelê giran ameyî dayîş’

 

Burcu Çelîk dîyar kerd ke ganî cinî, ciwan, rêxistinê komelê sivîlî û hetê cîyayê komelî bibê merkezê prosesê vurîyayîşî û semedo ke problemê bîyayeyî bêrê çareserkerdiş ganî gamê xurtî û bi qerardarî bêrê eştiş. Burcu Çelîk ard ziwan ke armancê înan no yo ke perspektîfê komara demokratîke xurt bikerê û cuye pîya bivûrnê. Burcu Çelîk wina va: “Şarê Tirkîya azadî û demokrasî heq keno. Şaran bedelê giran dayî. Ganî kodê xelasîya Tirkîya ancî bêrê munaqeşekerdiş û manadarkerdiş. Ganî hîn munaqeşeyî bêrê manadarkerdiş. Semedê ameyoxêk demokratîk ma do xebatan bidomnê û têkoşînê xo dewam bikerê.”