AMED - Cinîyê ke tewrê Mîtîngê Azadîye yo ke Amed de bi sloganê “Bi Rayberîya Azade Ver bi Cimatê Demokratîkî” ame organîzekerdiş bîyî, qetî kerdî ke lazim o rêziknameyê qanûnî tewr lez demî de bêrê bicaardiş.

 

Bi serkêşîya Têgêrayîşê Cinîyan ê Azadan (TJA), Partîya Herêmanê Demokratîkan (DBP’yî) û Partîya Têduştî û Demokrasîyî yê Şaran (DEM Partî) bi sloganê “Bi Rayberîya Azade Ver bi Cimatê Demokratîkî” Meydanê Îstasyonî yê Amedî de Mîtîngê Azadîye ame organîzekerdiş. Mîtîngo ke bi hezaran kesî tewrê ci bîyî de waştişê azadîya fîzîkî ya Rayberê Şarê Kurdî Abdullah Ocalanî ame kerdene. Wareyê mîtîngî de posterê Abdullah Ocalanî yê pîlî ameyî akerdene û verê deyîran de govende ameye geyrayîş.

 

Ciwan û cinîyan, bi cilanê neteweyîyan ê ke dayî xo ra, sloganê “Bijî Serok Apo” berz kerdî. Mîtîngo ke bi qiseykerdişê komîteya amadekar dest pêkerd, dima ci de Hemsereka DBP’yî Çîgdem Kiliçgun Uçar û Sekreterîya Îmralîyî ra Veysî Aktaş qisey kerd. Dimayê qiseykerdişan, derheqê têkoşînê Kurdan ê Rayberê Şarê Kurdî Abdullah Ocalanî de vîdyoyêke ame mojnayene.

 

Mîtîng bi deyîranê ke hetê hunermend Pinar Aydinlar, Kadir Çat û Serhado ra ameyî vatene û sloganê “Bijî Serok Apo” bi peynî bî.

 

Cinîyê ke tewrê Mîtîngê Azadîye bîyî, qetî kerdî ke lazim o rêziknameyê qanûnî tewr lez demî de bêrê bicaardiş. Hîs û fikrê xo ajansê ma JINNEWS’î rê ardî ziwan.