AMED- Şaredarîya Amedî ya Şaristanê Girdî, cayêko 14 hezar metrekareyî ser o ke tede 23 tewir nebatî do bêrê ramitene, baxçeyê nebatanê tibî û aromatîkqn virazenê. Baxçe do piştî bido îstîxdamê cinîyan.

 

Xebatê baxçeyê nebatanê tibî û aromatîkî ke projeyê hemparî yê Serekîyanê Daîreya Park û Baxçeyan, Vurîyayîşê Îklîmî û Eşteyo Sifir, Xizmetê Dewan û Xizmetê Cinî û Keyeyî yo û tede perwerde û berheminî zî do bibo, dest pêkerd.

 

Xebatê binawanî dewam kenê

 

Baxçeyê nebatanê tibî û aromatîkî ke do pêro pîya cayêko 14 hezar metrekareyî ser o bêro ronayene, xebatê binawanî (raştkerdişê zemînî û îlaweyê herre) reyde dewam keno. Cayê 14 hezar metrekareyî de badê xebatanê binawanî do xebatê serawanî dest pê bikê. Xebatanê serawanî de do 'ziwakerdişê nebatan, depo, karkerdiş, sinifî, baxçeyo berzkerde seba astengdaran û kokiman, beşê rotişî, serayî, cayê xebata nebatan, tarhê perwerde û ramitişê tewirê nebatanê xasan, cayê ramitişê nebatan, bostan, cayê kompost û herre' bêrê viraştene.

 

23 tewir nebatî do bêrê ramitene

 

No baxçeyo xas ke do erdê Şaredarîya Şaristanê Girdî yo ke rayîrê Farqînî ser o yo de bêro viraştene, tede bi nebatanê endemîkan pîya pêro pîya 23 tewir nebatî - bi hawayêko pêroyî tewirê nane û zahterî, papatya, reyhanê morî, hatmîn, çaya çemî, zeferan, gezgezik, melîsa, calendula, kantarona zerde, ekînezya, bîberîye, defne, ihlamur, gilgilê berî û sewzî (dere, meydenos, roka, pirpar ûsn.) - do bêrê ramitene. Arêkerdişê nebatanê ke baxçe de yenê ramitene, ziwakerdişê înan, vetişê runî û paketkerdiş pêro cayê ke do newe bêro viraştene, do bibê.

 

Proje do îstîxdamê cinîyan zêde biko

 

Projeyê baxçeyê nebatanê tibî û aromatîkî ke do bêro viraştene, do piştî bido îstîxdamê cinîyan ê bajarî. Cinîyî do qonaxanê ramitişê nebatan, berheminî, arêkerdişî, ziwakerdişî û vurîyayîşê mahsulan seba mahsulanê cîyayan (mahsulê kozmetîkî yê tebîî) de ca bigîrê. Bi no hewa cinîyî do hetê ekonomîkî ra qezenc bikê. Şaredarîya Şaristanê Girdî do cinîyanê ke projeyê baxçeyê nebatanê tibî û aromatîkî de do ca bigîrê, derheqê ramitişê nebatan, arêkerdişî, ziwaykerdişî û vurîyayîşê mahsulan seba mahsulan melumatê pratîkî bidê.

 

Her qat do perwerdeyî ra îstîfade biko

 

Şaredarîya Şaristanê Girdî do cayê peyzajî yê neweyî ke do bingehê têkilîya herre û merdimî yo ke tarîx ra heta ewro dewam keno ser o bêro viraştene de, heme qatanê komelî - domanî, astengdarî, kokimî û cinîyî - rê derheqê nebatanê tibî û aromatîkî de perwerdeyê pêroyî bido. Şaredarîya Amedî ya Şaristanê Girdî do serayanê ke cayî de do bêrê viraştene de bi girewtişê toxim û çelikan zêdebîyayîşê nebatan temîn biko.

 

Baxçeyo berzkerde seba astengdar û kokiman

 

Şaredarîya Şaristanê Girdî ke wazena heme qatê bajarî baxçeyê nebatanê tibî û aromatîkî ra îstîfade bikerê, cayî de do seba astengdar û kokiman nimûneyê baxçeyê berzkerdeyî ronê.

 

Bi saya baxçeyê berzkerdeyî astengdarê ortopedîkî (ke sandalyeya tekerlekine şuxulnenê) û kokimî do bieşkê tewirê cîya-cîyayê nebatanê ke cayî de estê, tira nêzdî ra biewnê, dest bidê ci û bigîrê.