MÊRDÎN - Mêrdîn de goreyê raporo ke derheqê şîdetî û metodê têkoşînî yê hemverê şîdetî dir amade bîyo, eşkera bî ke cinî zaf rey şîdetî sey şîdet nêvînenê. Hemşaredara Nisêbînî Gulbîn Şahîn va ke hemverê zordarîyê merdan de piştgîrîya cinî her tim xurt bena.

 

Bi serkêşîya Yewîya Şaredarîyan ê Başûrê Rojhelatê Anatolyayî (GABB), bi Şaredarîya DEM Partî ya Artukluyî û Şaredarîya Nisêbînî ra raporêk derheqê şîdetî û rêbazanê têkoşînê yê hemver şîdetî amade bîyo. Rapor amade bî û weşênayî, goreyê dayeyanê raporî beşêk girdî yê cinîyan şîdet sey şîdet pênase nêkenê. Goreyê xebata SAMERî zafêr cinî semedê zordarîyê merdan bêveng manenê, bi hawayêko azad qal nêkenê û sewbîna çimeyê probleman û debarî zî sey şîdet eşkera bîyo.

 

Hemşaredara Nisêbînî Gulbîn Şahîn derheqê raporî ke amade bîyo de qal kerd.

 

Gulbîn Şahîn va ke Mêrdînî de polîtîkayanê şerê taybetî şîdetî eşkera keno û va: “Serrêk o ma derheqê şîdetî û şîdet senî biqedîyo de xebatî kerdî. Verê semedo ke destê ma de xerîteya şîdetî çin bî, ma waşt çimeyan bivînê. Nê esasî de ma bi SAMERî dir Nisêbîn, Artuklu û Qoser de xebate kerd. Ma qezayanê ke nufûsê înan tewr zaf o de xerîteya şîdetî eşkera kerd. Xebata SAMERî de eşkera bî ke cinî zaf reyan şîdetî sey şîdet nêvînenê û nê sey teşeyê cuye vînenê. Cinî persa ‘şima şîdetî vînenê’ rê ‘nê’ va û peynî de bi persanê ke ameyî persîyayîş eşkera bî ke şîdet senî cuyê înan de ca girewto.

 

 

Deklerasyonê hempar û çareserî

 

Gulbîn Şahîn va ke xebate bi baldarî û hîrayî kerdê û va: “Ma hîrê qezayan de xebatî kerdî. Ma modelêk ke Mêrdînî de vila bibo awan kerd. Ma bi sazgehê cinîyan û sazîyê komela sîvîlî dir deklerasyonêk weşêna. Ma do hemver şîdetî de cigêrayîşê çareserî de bê.”

 

‘Merkezê cinî hetê qeyûman ra ame girewtiş’

 

Gulbîn Şahîn derheqê metodê têkoşînê yê hemverê şîdetî de qal kerd û va: “Wextê pêvînayîşan de hetê resnayîşê cinîyan de astengî est bî. Bîyayîşê mêrdan zaf reyan qalkerdişê cinîyan de astengî bî. Cinîyê ke mêrdeyê înan dir bî qal nêkerd û goreyê mêrdeyan va. Cinîyê ke mêrde înan dir çin bî, cinîyê ke perwerde dîyî, bi cesaret cewab dayî. Sebebê problemanê ekonomî çimeyê şîdetî mojna. Feqîrî yewser şîdetîdir girêdayeyo. Ma semedê cinîyan zaf wareyan de xebatan kenê. 2012ine ra heta nika ma stargeh, keyeyê cuye yê cinî, merkezê cinî û kompleksê sporî yê cinîyan akerd. La 2016ine de ameyîşê qeyûman dir ameyî girewtiş.”

 

Piştgîrîya cinî dir newe ra awan kerdî

 

Gulbîn Şahîn va ke xebatê derheqê cinî her tim hetê îqtîdarî ra asteng benê û va: “Destê ma de tena Merkezê Cuye û Piştgîrîya Cinî mend. Tîya ma yewîneyê psîkojîk û huqûqî ser o qursan awan kerd. Sewbîna ma xeta Alo Şîdetî zî kerd dewre. La Herêma Kurdistanî de cinî bi polîtîkayanê tersnayîşî sazgehan ra dûrî fînenê. Nê semedî ra ma mecbûr manenê keye bi keye xebatan bikerê. Huqûqnas û psîkologê ma cinîyan dir pêvînayîş kenê. Piştgîrî danê, xeta şîdetî mojnenê.”