Melek Avci

 

ANQARA - Sereka Pêroyî ya Baskê Cinîyan ê Partîya Saadetî Nurgul Beytîye Ekîncî prosesê aşitîye ercna û va ke aşitî bi mutabaqatêk komelî mumkîn a, cinî nê prosesî de bi keda xo aşitî honanê. Beytîye Ekîncî wina va: “Bêzelalbîyayîşî cinî zî partîyê sîyasî zî nêeşkenê bi tesîr tewrê nê prosesî bibê.”

 

Çarçewaya çareserîya demokratîke ya meseleya Kurdî de 1ê teşrîna verênê de munaqeşe û çareserî dest pêkerd. Na çarçewaye de komîsyonê meclîsî xebatanê xo dewam keno. Ey dir zî rolê cinîyan ê nê prosesî de zaf reyan ame ziwan. Sereka Pêroyî ya Baskê Cinîyan ê Partîya Saadetî Nurgul Beytîye Ekîncî ajansê ma rê qal kerd.

 

‘Lazim o çareserî de her kes ca bigîro’

 

Nurgul Beytiye Ekîncî va ke na çareserî de lazim o her partîyê sîyasî, her sazgehê komela sîvîlî û her kulturî bibê. Nurgul Beytiye Ekîncî va ke Tirkîya wayîrê mozaîkêk hîrayî ya û zaf rengî, bawerî û kulturî est ê. Nurgul Beytiye Ekîncî wina va: “Ma qalê warêk wina zaf rengî kenê. Lazim o ma pîya nê welatî de piştgîrî bidê rayîrê ke merdimayî ra şona. Lazim o kes kesî rê çîyêk ferz nêkero. Lazim o ez sey Beytiye bîyayîşê xo dewam bikerî, şima zî sey xo. Ewro yewin meseleya ma aşitî ya.”

 

‘Lazim o aşitî her kesî bihewêno’

 

Nurgul Beytiye Ekîncî dewam de wina va: “Lazim o aşitî her kesî bihewêno. Her kultur, bawerî, cins, nêweş, astengdar, her kesî bihewêno. Dewlete çîyêk wina ya. Temamê kultur û bawerîyan îdarekerdiş o. Tirkîya de eke terzê cuyan yewbînan rê bêro musnayîş do nê welatî de aşitîya rastî zî bêro. Sewbîna aşitîya mende, yewbîyaye nêasena. Eksê nê bêtêduştî ya. Ma 82 mîlyonî verê huqûqî de têduşt ê. Na têduştî lazim nîyo ke sey herre, sey keye, sey mercî cîya bo.”

 

‘Her hetî ra cinî semedê aşitî têkoşîn kenê’

 

Nurgul Beytiye Ekîncî bale ant têkoşînê cinîyan yê cepheyê verîn yê prosesê aşitî û wina va: “Ez zerrî ra bawer kena ke cinî zî bi qasê mêrdan tesîrê nê prosesî kerd. 12 serrî yo ez Partîya Saadetî de baskê cinîyan de xebate kena. Tirkîya de geyrena. Her hetî de cinî, wendekaranê zanîngehan heta rojnamegeran, heta sîyasetmedaran, heta akademîsyenan û esnafê cinî semedê aşitî têkoşîn kenê. Nê semedî ra zî nê prosesî de bîyayîşê cinî zaf bi qîymet o. Tena nê prosesî de nê, heta nika her prosesî de cinî semedê viraştîşê prosesê aşitî bi xebatanê xo zêmîn amade kerd. Her hetî ra cinî semedê aşitî piştgîrî û hewildayîşêk girdî da. Ez her cinîyê ke piştgîrîya nê prosesî kerdî rê sipas kena.”

 

‘Her xebata ma semedê prosesî piştgîrî ya’

 

Beytiye Ekîncî derheqê xebatanê ke înan kenê zî qal kerd û wina va: “Her xebata ma ya baskê cinîyan semedê prosesê aşitî piştgîrî ya. Ser ala Partîya Saadetî de aşmî û 5 estareyî est ê. Înan ra yew aşitî ya. Ma teşkîlatêk ke tenê semedê Tirkîya nê, semedê temamê dinya aşitî wazenê yê. Na mesela de ma teberê aşitî çîyêk nêfikirîyenê. Aşitî çîyêk ‘bêrê ma yewbînan dir aştî bikerê’ nîya. Aşitî eke pêrodayîşêk estbo, şaşîyêk estbo, lazim o merdimî ozir wazenê ya. Diyîn bêtêduştî estbo, lazim o a bêtêduştî werte ra wurzo. Hîrêne lazim o têduştî bêro şuxulnayîş. Lazim o çimeyê nê welatî hîn komelan, hîn bajaran, hîn keyeyan rê nêbê visnayîş. Lazim o semedê 81 bajaranê Tirkîyayî bi têduştî bêrê şuxulnayîş. Aşitî wina mumkin a. Sewbîna mumkin nîya. Lazim o sewîyeya kultur, averberdiş, aramîya nê merdiman bêro zêdekerdiş.”

 

‘Armancê ma piştgîrîya semedê aşitî ya’

 

Nurgul Beytiye Ekîncî va ke nika ra armancê înan piştgîrîya semedê aşitî bo û wina va: “Çunke ma ewro yew bê, la hîmê aşitî baş nêameyo ronayîş, saxlem nêameyo ronayîş, îhtîmalê ke ancî aşitî agêrê şer est o. Semedo ke aşitî dewam bikero, çi destê ma ra bêro ma do bikerê.”

 

‘Prosesê mizakeran de cinî nêvînenê’

 

Nurgul Beytiye Ekîncî dewam de va ke wareyê ke cinî nêbê, wareyê dewlete û komelî qels o û va: “Komîsyono ke semedê aşitî ameyo viraştîş de vernîya cinî lazim o temsîlkarîyê sîyasî bêrê qalkerdiş û tesîrê komîsyonê ameyo viraştîş bêro qalkerdiş. Verê qalkerdişê prosesê aşitî, lazim o zelalîya hukmatî bêro qalkerdiş. Eke wina bo, yê bînî zî nêameyî qalkerdiş. Ma 100 cinî yan zî hezar cinî yan zî temamê komîsyonî cinî bikerê no goreyê mi çîyêk îfade nêkeno. Waştişê ma no yo ke proses hetê dewlete ra rast bêro şuxulnayîş. Sey ke mi sere de zî va, lazim o ma nê kemasîyê cinîyan, kemasîyê prosesî bivînê. Wareyê ke cinî nêbê, qerarê ke gênê zî kêm ê. Wexto ke ma vanê cinî bê, ma qalê cinîyê bi lîyaqetî kenê. Cinîyê bi lîyaqetî est ê, qetî est ê. Ma vînenê ke cinî xo zaf baş resnenê.”