Buşra Turan

 

WAN - Wekîla Serekê Odaya Esnafanê Berber, Kuafur û Salona Bedewbîyayîşî Nejla Delen va ke krîzê ekonomî tesîrêk pîl esnafê qijî ser o keno û va ke semedê kirêyanê zêde esnafî nêşenê debarê xo bikerê.

 

Seranserê Kurdistanî û Tirkîya de goreyê dayeyê fermîyan îstîhdamê cinîye heta se ra 31.4 kewto war û betalîya cinîyan zî se ra 37.7 a. Krîzê ekonomî barê cinîyan her ke şino giranêr keno.

 

Astengîyanê vernîya temsîlkarîya cinîyan û tewrbîyayîşê hêzê xebatî dewam kenê û serra peyêne de no tesîrêk pîl kargeyanê esnafan ê qijan ser o kerd.

 

Esnafê qijî hema hema nîmeyê qezencê xo danê kirêyan û semedê zêdebîyayîşê vayî, esnafî hewl danê lingan ser o bimanê û têkoşîn danê.

 

Esnafa 18 serran

 

Wekîla Serekê Odaya Esnafanê Berber, Kuafur û Salona Bedewbîyayîşî Nejla Delen derheqê krîzê ekonomî de qisey kerd.

 

Nejla Delen a ke 18 serrî yo dikanê xo xebitnena va ke emrêk qijî de dest bi meslega xo kerda û va: “Cinî bi hewldayîşî şenê her cayî de biserkewê. Mi emrêk qijî de dest bi xebate kerd. Mi xo nê wareyî de aver berd. Ez şîya Merkezê Perwerdeyê Şagirtîye. Mi belgeyê westatî girewt. Dima ra mi 6 serrî mamostatîye kerd. Mi Lîseya Meslegî ya Kênayan de dersa kuafurî da. Na cografya de rewşa cinî zehmet a.”

 

Esnafê qijî yenê binpaykerdiş

 

Nejla Delen wina va: “Krîzê ekonomî ra esnafê qijî zaf tesîr benê. Kira û mesref zaf zêde yê. Hem zî muşterî kêm benê. Goreyê serrê vîyarteyî hûmare zaf kewta. Verê xebata ma zaf zêde bî. Nika esnafî hetê ekonomîkî ra zehmetîyanê pîlî ancenê. Nîmeyê qezencê ma şino kîra rê. Ma nêşenê semedê xo tu çîyêk bikerê.”

 

‘Ma çareserîye wazenê’

 

Nejla Delen wina qedêna: “Mesrefê zêde û problemê îstîhdamî esnafê qijî zor de verdanê. Ma mecbûr ê ke mesrefanê xo kêm bikerê. Ma hûmara xebatkaran zî kêm kerd. Lazim o ke dewlete kira û fatureyan semedê çareserîyêk bivîno. Zêdebîyayîşê kirayan, xirabbîyayîşê ekonomî ma endîşedar keno.”