Berîtan Tunç

 

ÎZMÎR - Dayîka Aştîye Peyruze Kurte ya ke tewrê merasîmê veşnayîşê çekan bîye wina vat: “Ganî dewlete game bierzo. Heta ke berê Îmralîyî nêabê, tu kes bawerîya xo bi prosesî nêano.”

 

Çarçewa prosesê bi vengdayîşê ‘Aştî û Cimatê Demokratîk’ yo ke Rêberê Şarê Kurdî Abdullah Ocalanî 27ê Sibate 2025ine de kerd de, bi rayberîya Hemsereka Konseya Îdarekarîya KCKyî Besê Hozat û komêke gerîla 11ê Temmuze de Şikefta Casenî ya bajarê Silêmanî ya Herêma Federal a Kurdistanî de bi merasîmek çekê xo veşnayî. Pêwa ke serê merasîmî ra serrêk derbas bîyo zî, hema îqtîdar tu game nêeşta û sererastkerdişêko qanûnî nêkerd.

 

Şer de di tutê aye ameyî qetilkerdiş 

 

Dayîka Aştîye Peyruze Kurte şahîdîya merasîmî kerd. Peyruze Kurte şer de di tutê aye dinyaya xo bedelnayî. Peyruze Kurte şahîdîya xo ya merasîmî JINNEWSî rê qisey kerd.

 

Şahîdîya merasîmê tarîxî kerd

 

Peyruze Kurte dîyar kerd ke wextê ke şîyî Silêmanî hêvîya aştîye zî pîl bîye û wina vat: “Bi serkêşîya cinîyan 30 gerîla ameyî ware. Heme komeleyê kurdan, tirkan, leşkerê Amerîkayî amade bîyî. Hevalî ameyî. Eşkerayîye wendî. Çekê xo bi îradeyê xo veşnayî.”

 

‘Ma teslîmîyet qebûl nêkenê’

 

Peyruze Kurte dîyar kerd ke serrêk merasîmî ser o derbas bîyo û va: “Hema zî ma ra paweyê ke ma teslîm bibê. Bi ziwanêko ke wazenê tesfîye bikê qisey kenê. No nîno qebûlkerdiş. No ziwanê aştîye nîyo. Semedê ke nê ziwanî şixulnenê bawerîye zî nêmanena. Kurdî nê ra bawer nêkenê.”

 

‘Ma aştîye wazenê’

 

Peyruze Kurte qiseykerdişê xo wina dewam kerd : “No şar rastê xeylêk qirkerdişan ame. Ma tim nêwazenê nê bîyarê ziwan. Pêwa nînan ma bi hêvî aştîye pawenê. Wa dayîkê tirkî û kurdî nêbermê. Êdî bes o. Tena waştişê ma aştî ya. Wa tutê ma nêmirê. Wa aştîye bêra û heme dayîkî biresê tutanê xo. Ganî dewlete game bierzo. Bi hêzê serekî 24 saetan de çekî ameyî veşnayîş. Têgêrayîşî xo fesih kerd. Bi vatişê serekî kongre kom bîye. Qerar ame dayene. Ewro ra tepîya ganî berê Îmralîyî bêrê akerdene.”

 

Problemê seserrî

 

Peyruze Kurte dîyar kerd ke problemê kurdî problemêko seserrî yo û nê çîyî ardî ziwan: “Proses bi erj o. Ma destê aştîye derg kerd. Gamanê ke têgêrayîşî eştî hêvîya ma pîl kerd. Hêzê xo wareyê şerî ra antî. Tutanê ma dinyaya xo bedelnayî. Ma kêfweş ê ke tîya ra tepîya do cenazeyî keyeyê tu kesî ra nêvejîyê. Sewbîna ganî qanûnê bingehîn zî bi fikranê hemparî bêro vetene. Ganî qanûnê bingehîn de heq û huqûq estbo. Ma prosesêko krîtîk de yê. Ganî meclîs nêkewo betlane. Ganî berê meclîsî akerde bê û faliyet û wezîfeyî dewam bikê.”