Sema Çaglak

 

AMED - Tîyatrokarê cinî, Roja Tîyatro yê Dinya pêro tîyatrokaran rê fîraz kerdî û vatî: "Bi xêrê têkoşînê tîaytrokaran xeylêk çî wareyê tîyatro de vuryayî û nika mîyanê komelî de zî wayîrvejîyayîşêko pîl esto."

 

Roja Tîyatro yê Dinya, hetê Yewîya Tîyatroyê Netewî (ITI) serra 1961 de her serre 27ê Adare de yeno fîrazkerdene. Na roje de xebatkarêk tîyatroyî vilawekêke nuseno û na vilaweke semedê xeylêk ziwanan yena açarnayîş. Reya ewil vilaweke hetê Jean Cocteau, nuştoxo fransij ra ameya nuştene. Her serre na roje de vilaweke hetê rejîsor yan zî tîyatrokarêk ra yena nuştene û wina dewam keno.

 

Hem problem hem zî teda yenê serê ziwanî

 

Kaykerdoxa tîyatroyî Perînaz Delazî ke Wan de Tîyatroyê Mencelî de bi kurdkî tîyatrokarî kena vat ke emsar pandemî ra zêde aktîf nêbîyê û vat: "Çi heyf, emsar wareyê tîyatro de bêvengî esta. Semedê polîtîka yan zî bêpolîtîkayê hukmatî, sazgeh û dezgehê ke serê kultur û hunerî de xebityenê, tay zehmetî ancenê. Semedo ke kes paştdayîş nêdano. Coka ma zî sey sazgehê bînan serê linganê xo de vinderê. Ma sey tîyatrokarê kurdî hem problemê ekonomî û hem zî kurdbîyayîş ra rastê tedayan yenê. Helbet sey verê nîyo la reyna zî tedayê ser ziwan û kurdan hema zî xo her ware de ramojneno."

 

'Semedê tutan ganî xebate bêra kerdene'

 

Perînaze dîyar kerd ke eleqeyê temaşewanan baş o û vat: "La goreyê mi ganî tîyatroyêke tutan zî bibo. Tewr zêde semedê pîlan tîyatro esto, la ganî girîngî bidê tîyatroyê tutan zî. Semedo ke ma neslê neweyî rê biresnê. Tewr peyîn zî 27ê Adare roja Tîyatrokaranê Dinya heme tîyatrokaran rê fîraz kena û hêvî kena ma tîyatro biresnê her ware."

 

'Hemverê tîyatroyî hetê komelî ra pawitişêk virazyayo'

 

Kaykerdoxa Tîyatroyê Şaristanê Girdî ya Amedî, Şahperî Alphan zî vernêde roja tîyatrokeran fîraz kerd û vat: "Xeylêk rojî estê yenê fîrazkerdene. 27ê Adarê zî hetê tîyatrokaran yeno fîrazkerdene. Verê, huner de karêko erjnaye nêameyîne vînayene. La nika no nêzdîbîyayîş zaf ameyo vurnayîş. Êdî hemverê tîyatrokaran û tîyatroyî nermbîyayîş esto, têkilîyê înan êdî germ bîyo. Verê nêzdîbîyayîşêko wişk estbi hemverê tîyatro. No zî yeno a mana ke hemverê nê têkoşînêk ameyo dayene. Bi no hawa hemverê tîyatro hetê komelî ra pawitişêk virazyayo."

 

‘Roja Tîyatrokaran ê Dinya fîraz bo'

 

Şahperî dîyar kerd ke tîyatro rastîya komelî ano ziwan û wina qedêna: "Her wext tîyatro çîyo ke bi hîsê însanî yeno kerdene yo. Yan zî tîyatro rastîya merdimayî yo. Ez 27ê Adare heme tîyatrokaran rê fîraz kena û serkewtiş semedê ma û semedê heme tîyarokaran rê wazena. Ez bawer a ke tîyatro her wext bi germbîyayîş û nermbîyayîşê xo hêz bido komel û bi ê têkîlî tîyatrokarî her wext komel de bibê."