MERKEZÊ XEBERAN - Emîne Şenyaşar û lajê aye Ferît Şenyaşar ke verê Edlîyeyê Rihayî de çalakîya “Nobetê Edaletî” kenê, reyke bîn ameyî destbendkerdene.

 

Emîne Şenyaşar û lajê xo Ferît Şenyaşar ke bi waştişê “Edaletî” vernîya Edlîyayê Rihayî de çalakîya nobetî dayî destpêkerdene roja 22yîn de dewam kenê. Emîne Şenyaşar û lajê xo Ferît ke çalakîya xo dewam kenê, hetê polîsan ra vera ke sebeb bêro ramojnayîş, ameyî destbendkerdene.

 

Keye 9ê adare ra çalakîya xo dewam keno. Emîne Şenyaşar 15ê adare de bi sebebê, "heqaret wezîfedarê selahîyetdaran rê kerda" amebî destbendkerdene û dima ra amebî veradayîş. Emîne Şenyaşar û lajê xo Ferît dir 25ê adare de zî bi sebebê, "muxalefetîyê qanûnê kombîyayîş û rayrayîş kerdê" ameybî destbendkerdene û dima ra amebî veradayîş. Ferît Şenyaşar vizêr serê gerrekerdişê birayê Îbrahîm Halîl Yildiz yê wekîlê AKPyî, Suleyman Yildiz şibi Mudurîyê Polîsan ê Pirsûsî û îfade dabi.

 

'Paştdayîşê semedê ma dewam keno'

 

Keyeyê Şenyaşarî serê hesabê xo yê Twitterî de nê eşkerayî dayî: "Têkoşînê ma yê edaletî roja 22yîn de qesrê edaletî de dewam keno. Serdozgerî her roje verê ma ra derbaz beno. Ewnîyeno ma ra la ma nêvîneno. Her çiqas serdozger û Wezîrê Dade ma nêvînê zî qîrkerdişê ma yê edaletî her şaristanê Tirkîya û welatê Ewropayî de yeno eşnawitiş û paştdayîşê semedê ma dewam keno."

 

Mêrdeyê Emîne Şenyaşar, Haci Esvet Şenyaşar û di lajê aye hêrişê AKPyan de verê Weçînayîşê Pêroyî ya 24ê Hezîrana 2018ine qezaya Pirsûsî ya Rihayî amebî kiştiş û lajê aye Fadil Şenyaşar zî tepişte yeno muhakemekerdene.