Sema Çaglak

 

RIHA - Hemsereka HDPyî ya Xelfetî ya Rihayî Fatma Korkmaz dîyar kerd ke her serre pêwa tedayan herikênê Amara û vat: "Hemverê Xelfetî her wext polîtîkayê taybet yenê kerdene, bi taybetî zî 4ê Nîsane de teda hemverê şarî vejîyeno sewîyeya tewr berz. Şar zî bi xoverdayîş cewab danê teda û astengîyan."

 

Şarê Kurdî serra 2004ine ra heta 2017ine her serre 4ê Nîsane de Rojbîyayîşê Rayberê PKKyî Abdullah Ocalanî bi sloganê “Raywanîya Rojî” verê xo danê dewa Amara ke Abdullah Ocalanci uca de ameyo dinya. La nê 4 serrê peyîn semedê qedexe, OHAL, ablûqayê leşker û polîsan nêeşkenê rayrayîşê xo bi girseyî bikerê. Her serre rayrayîş bi rayberîya Federasyonê Komeleya Keyeyê tepişteyan (TUHAD-FED) ameyîne kerdene. La dimayê ke TUHAD-FED bi qerarê KHKyî ame padayîş, şarî bi hewldayîşê xo rayrayîş kerd. Par semedê janê vîrusê koronayî (Covîd-19) bi girseyî bernameyê pîrozkerdişî ameyî kerdene. Sewbîna pêwa korona estbi zî heme rayîrê ke şîne Amara bi TOMA û makîneyê zirxî ameyî padayîş.

 

'Pêwa tedayan şar herikêno Amara'

 

Hemsereka Partîya Demokratîke ya Şaran (HDP) ya qezaya Xelfetî ya Rihayî Fatma Korkmaz dîyar kerd ke bi nêzdîbîyayîşê 4ê Nîsane ra Xelfetî de teda keweno sewîyeya tewr cor û wina vat: "Hewteyêke verê 4ê Nîsane Xelfetî de qedexeyî dest pêkenê. Heme rayîrê ke ver bi dewa Amara û Xelfetî ra şinê yenê padayene. Pêwa her tewir astengî şar semedê pîrozkerdişî herikêno Amara.”

 

'Dîyalog do bibo hizûrê Rojhelatê Mîyanên'

 

Fatma ard ziwan ke ganî bi lezabez Abdullah Ocalan dir pêvînayîş bêro kerdene û vat: "Heta ke tecrîdê serê Abdullah Ocalan nêro peynî kerdene mimkun nîyo ke aştî bêro. Bi 4 serrî yo serê qezaya Xelfetî de qedexe esto. Eke bi birêz Ocalanî dir dîyalogêke bêro kerdene do no çi bibo hizûrê Rojhelato Mîyanên zî. Berê aştî û aramî Îmraliyî de yo. Dewlete zî nê çî zana û dinya zî zana. La helwestê xo yê bêhuqûqî û bêheqî dewam kenê. Semedo ke nêwazenê aştî bibo."

 

'Bi tedayan koçberî ferz kenê'

 

Fatma eynî wextî de dîyar kerd ke bi nê qedexe û tedayan koçberî roniştixê tîya rê ferz kenê û wina qedêna: "Xelfetî de xeylêk netew estê û mîyanê înan de tu problem çin o. Pîya ciwîyenê. Dewlete bi polîtîkayê taybetî wazena ke roniştixê tîya yewbînan rê bikero dişmin û koçberî înan rê ferz kena. Wazena ke Xelfetî veng bikera. Pêwa nînan ma xebatanê xo bêmabên dewam kenê. Ma dewe bi dewe, keye bi keye gêrenê. Ganî baş bêro zanayene ke Xelfetî de kesêk peyser game nêerzeno."