Sema Çaglak

 

RIHA - Seher Sariçîçeka 89 serrî ke şahidî tutîyê Rayberê PKKyî Abdullah Ocalanî rê kerda wina vana: "Semedo ke êdî serê na herre de gonî nêro rijnayene, ganî Abdullah Ocalan azad bibo."

 

Seher Sariçîçek ke 89 serrî ya û dewa Cibînî ya Xelfetiyî ya girêdayê Rihayî ra ya, şahidî tutîyê Rayberê PKKyî Abdullah Ocalanî rê kerda.

 

‘Her wext persê mi kerdêne'

 

Sehera ke lajê aye Huseyîn Sariçîçek û zamayê aye Hasan Bîndal zî embazê Abdullah Ocalanî yê, dîyar kerd ke o wext Abdullah Ocalan û embazê ey her wext ameyîne keyeyê ma û vat: "Abdullah Ocalan o wext dewa ma de mektebe wendêne. Rojêke ameyî û ma rê werd ardî. Bi embazanê xo dir ameyîne werd werdêne û dima ra zî şîne serê banî. Abdullah Ocalan, Hasan Bîndal û lajê mi Hûseyîn embazê yewbînan bî. Her wext têhet de bî. Her hewte reyke dewa Amarayî ra ameyîne dewa ma û bi embazanê xo dir wext derbaz kerdêne. Sewbîna her wext rewşa mi pers kerdêne. Mi ci ra zaf hes kerdêne. Wexto ke ameyîne vernê de ameyîne verê mi û dima ra şîne verê lajê mi. Nêwaştêne mîyanê însanan de cîyayîbîş bibo. Tena semedê kurdan ney, semedê tirkmen, ermenî û xeylêk kesan têduştî waştêne. Zerrîya ey de heskerdişêke pîl estbi. Coka heme însanî Abdullah Ocalanî ra zaf hes kerdêne."

 

'Tezbîhe semedê mi zaf bi qîymet a'

 

Sehere tezbîha Abdullah Ocalanî ke ci rê dîyarî kerda vet û ramojna û wina vat: "Rojêke reyna Abdullah Ocalan û embazê ey ameyî keyeyê ma. Abdullahî na tezbîhe dîyarîya mi kerde. Na tezbîhe dendikê zeytûnan ra bi destê xo viraşta. Na tezbîhe daya mi ke ez verê xo de wedarnî. Xeylêk kesî tezbîhe mi ra waşt, la mi nêda tu kesî û heta nika zî nimnena. Na tezbîhe semedê mi zaf bi qîymet a. Mi xo zaf erjîyaye hî skerd."

 

Tedayê dewlete

 

Sehere dîyar kerd ke Abdullah Ocalan serê însanan de tesîrêk verdayîne û vat: "Mabêne Abdullah û Hasanî zafweş bî. Seke birayê yewbînan bê. Xeylêk rey ameyîne keye, yewbînan dir wext derbaz kerdêne. Dimayê şîyaşî ey çend serrî derbaz bi zî teda serê keyeyî ma kêm nêbi tewr zêde bi. 3 rojan ra reyke eştêne serê keyeyê ma. Vatêne, Hasan Bîndal ameyo keyeyê şima, şima wayîrê ci vejîyayê, şima embazê ey bî. Ma qey embazî çîyêk xirab o! Felaketêke zaf pîl ardî sereyê ma. Kênaya mi û zamayê mi Hasan zaf destê dewlete ra antî."

 

‘Abdullah Ocalan semedê pêro kesan temînatê azadîye yo’

 

Sehere vat wexto ke Abdullah Ocalan ameyo tepiştiş, xeylêk kewta ver û vat: "Abdullah Ocalan semedê pêro şaran temîntê azadîye yo. Tepiştişê ey merdimî zaf xemgîn keno. Ganî merdimêko wina binê tecrîdî de nêbo. Xeylêk bedel dayo. Semedo ke êdî serê na herre de gonî nêro rijnayîş ganî Abdullah Ocalan azad bibo."