RIHA - Roniştişê dewaya qetilkerdişê keyeyê Şenyaşarî Meletî de dest pêkerd. Hetê bînî ra dayîke Emîne verê Edlîyeya Riha de nobeya xo ya edaletî rê dewam kena.

 

Emîne Şenyaşara ke qezaya Pirsûsî ya Riha de wird lajê ci û mêrdeyê ci hetê pawitox û merdimanê Wekîlê HDPyî Halîl Îbrahîm Yildizî ra kişîyayî lajê xo roja 25ine de verê Edlîyeya Riha de nobeta edaletî rê dewam kena.

 

Hetê bînî ra ewro Mehkemeya Cezaya Girane ya Meletî de roniştişê dewaya qirkerdişî esto. Ferît Şenyaşar Meletî de tewrê roniştişî beno. Emîne Şenyaşar lajê xo yê bînî Mehmet Şenyaşarî reyde nobeta edaletî rê dewam kena.

 

Dayîke Emîne derheqê roniştişê dewa de qisey kerd û vat: ''Lajê mi Fadil 3 serrî yo bîlaheq tepişîyeno, ez wazena o vera bidîyo. Lajê mi rê cezaya 150 serran yena waştene. 25 rojî yo ma xîret kenê ke rixmê astengîyan vengê xo bidê eşnawitene. Vizêr polîsan lajê mi Ferît erdî ra kaş kerd. Qetilkarê lajanê mi serbest ê. Ganî polîsî qetilkeran asteng bikerê. Ma edalet wazenê."

 

Dayîke Emîne Şenyaşar pare kerd ke keyeyê Yildizî rehetîye nêdano înan coka a tewra roniştişî nêbîya. Dayîke Emîne vat: ''Ez hînî pê nê zulmî nêeşkena. Lajê mi 3 serrî yo odayêke de tepişîyeno. Kamî lajê mi kiştî? Hem na dinya de hem zî axîret de ez pê keyeyê Yildizî razî nîya."