RIHA - Emîne Şenyaşar reaksîyon vera birnayîşê cezaya 37 serrî û 9 mengî lajê ci Fadil Şenyaşarî ameya dayene da û vat, qeraro ke ameyo dayîş, teberê edaletî yo. Emîne wina vat: "Dadgehe bi nê qerarî wazena Fadilî zîndan de bikişo. Wijdanê dewlete û polîsan çin o."

 

Qezaya Pirsûsî ya Rihayî de 24ê Hezîrana 2018 de verê weçinayîşî avûkat û merdimê parlamenterê AKPyî Îbrahim Halil Yildiz hêriş kerdibî û Haci Esvet Şenyaşar, lajê ey Celal û Adil Şenyaşar bi temamî 4 kesî dinyaya xo bedilnabi.

 

Vizêr roniştişê dewaya 3ine Dadgeha Cezaya Giran ya Meletî de amebi destpêkerdene de qerar ame dayene. Heyetê dadgehe 37 serrî û 9 mengî cezaya zîndanî Fadil Şenyaşaro ke di bira û pîyê ey ame kiştene û o zî bi birîndarî kerdî zîndan, birna. Sewbîna 18 serrî ceza Enver Yildiz rê ame birnaye.  Qerarê dewamê tepiştişê her di versucan ame dayene.

 

Emîne Şenyaşar ke mêrde û di lajê aye ame kiştene, derheqê qerarî de qisey kerde.

 

'Wijdanê dewlete û polîsan çin o'

 

Emîne Şenyaşar bi vatişê "Qey bes nîyo, çîyê ke şima ardê sereyê ma" reaksîyon vera qerarî da û vat: "Ma tena edalet waşt labelê dewlete nê bi ca nêard. Polîsan lajê mi Ferîtî erd ra kaş kerdî, wexto ke lajê mi hêrsan ra biecya, dayî linga ey ro. Wijdanê dewlete û polîsan çin o. Ma semedê waştişê edaletî şî verê edlîye. Labelê ê ma taqîb kenê û hêrişê ma kenê. Semedê rastî vejîyê werte coka verê edlîye de ronişnenê. Nêzdîyê 40 serrî ceza dayê lajê mi. Keyeyê mi vila kerdî. Çaw dewlete gerek heme rastî eşkera bikerdêne? Çira şima qeydan nimnenê û şima gunahkar benê û dima ra zî şima ceza danê lajê mi. Pêro kesî rastîyan zanê. Do dinya bîne de destê mi serê şima de bo."

 

'Wazenê Ferîtî zî bikişê'

 

Emîne dewam de va ke înan hemverê zulmî êdî nêeşkenê îdare bikerê coka do cayê xo terk bikerê û vat: "No senî edalet o, no senî zulm o û dewletêka senîn a? Bi nêzdîyê mengêke ez semedê edaletêî ronişnena. La polîsî her wext hêrişê ma kenê û ma destbend kenê. Dayî lajê mi ro, dayî linga ey ro. Wazenê ey zî bikişê. Ma se kerd ke nê çî heq kerd. Ma tena edalet geyrayî. Polîsî çira ma rê wina kenê. Wa Homayî ra bivînê."

 

Wexto ke ma roportaj girewtêne televîzyon akerdebi û xebera derheqê qerarê dadgehe ame weşaneyene. O wext hêsirê Emîne ameyî war. Emîne bi nê vatişan qîra, "Homayê mi ti nê zulmî vînenê?"

 

'Edalet ça de yo?'

 

Emîne dîyar kerd ke eksê ke tutanê aye kiştê, DAÎŞî ra tewr xirab ê û vat: "Lajê mi Fadilî bi birîndarî kerdî heps. Ma dimayê hedîse yê ke birîndar bîbî ma nimit. Eke ma wina nêkerdêne, înan ey zî bikiştine. Labelê dadgehe bi nê qerarî dayî wazena Fadilî zî zere de bikişê. Wa Homa heqê ma nêverdo. Çira qeydan nimnenê. Tena zulm ma rê kenê. Merdim nêeşkeno no welat de biciwîyo. Na dewlete, dewletêke rastîyan eşkera nêkena ya. Kiştoxî dîyar ê la hema zî yenê nimtene. Yê ke nê ma rê kerd, wa tewr xirab bêro sereyê înan. Ma şêrê ça, polîsî her wext pey ma de yê. Lajê mi se kerd? Edalet ça de yo?"

 

'Her roje ma taqîb kenê'

 

Emîne dîyar kerd ke her çî eşkera yo labelê ceza înan rê birnayî û wina vat: "Verê zî semedê şîşeyek nê di kesî kiştî. Ma cayêke edlîye ra dûr roniştî labelê destûr nêdayî nê zî. Her roje ma taqîb kenê. Her çî verê çiman de yo. Wazenê her yewî cayêk de bikişê."