STENBOL - Sîyasetmedaran reaksîyon vera operasyono ke Amed de hemverê sîyasetmedarê cinîyan de ame kerdene dayî û dîyar kerdî ke îqtîdar hewl dano ke cinîyan bitersino û vat, ganî bi paştdayîşêko enternasyonal paştdayîş semedê têkoşînî bêro dayene.

 

Amed de 4ê Nîsane de Komeleya Cinîyan a Rosa zî tede erzîya xeylêk adresan ser. Mîyan de Partîya Herêma Demokratîke (DBP), Partîya Demokratîke ya Şaran (HDP), Tevgerê Cinîyan ê Azadan (TJA) û muxabira ma Berîtan Canozer û komî de 22 cinî ameyî destbendkerdene. No operasyon ke dimayê peyserantişê  Pêkerdişê Stenbolî de ame kerdene, sey, ‘hewl danê ke cinîyan bitersnê' ame şîrovekerdene. Sewbîna qerarê nimitişî dayî serê dosya.

 

Temsîlkarê partîyê sîyasîyê cinîyan reaksîyon vera destbendkerdişan dayî.

 

'Têkoşînêko girîng o'

 

Vervatoxa Kongreya Demokratîke ya Şaran Îdîl Ugurlu vat ke têkoşînê cinîyan hemverê faşîzmî bîyo barîkatêke ûvat: "TJA hetê pêro tevgerê cinîyan ê dinya ra yeno taqîbkerdene. Xebatê înan yenê taqîbkerdene. Yew tevgerê rayberê cinîyan o. Reyna komeleya cinîyan girêdayê cayêke nîya. Dayîkê Aştîye reyna wina. Yew têkoşînê girîng ê nimûneyê dinya yê. Îqtîdar bi hêrişê sîstematîk hewl dano ke cinîyan bê hêz bikero. La do bi ca nêro. Îqtîdaro ke xeylê cinîyan ra nîno tesdîqkerdene esto. Cinî têkoşîn kenê, fek azadî, nasname û heqanê xo ra vera nêdanê û do hîna pîl bikerê. Cinî ten abi pêkerdişî sînordar nêmanenê. Pratîkê nê zî kenê cuye. Ganî paştdayîşêko  enternasyonal semedê cinîyan paştdayîş bêro dayene."

 

'Komelaya Rosa Amed de bî hêvî'

 

Hemsereka Pêroyî ya Partîya Xelisnayîşê Newe ra Sosyalîst (SYKP) Canan Yuce zî wina vat: "Bi operasyonê peynî mesajê, ‘yan şima do sereyê xo bitewenê yan zî şima do rastê tedayan bêrê' dayî. Cinî, demêke derg o hemverê polîtîkayê îqtîdarî bêveng nêmanenê. Ma dî ke prosesê pandemî de zî cinîyan têkoşînê xo kerdo. Qeyûm tayînê sazgehê ma kerdî. La ma reyna komele akerd. Ma vat, 'ma her ca de têkoşîn kenê.' Komeleya Cinîyan a Rosa demêko teda zêde bîne de Amed de bî hêvî. Komeleya Rosa roja ke ameye awankerdene ra heta ewro rastê tedayan ameye. Îqtîdar hewl dano ke tevgerê cinîyanê kurdan biqedêno. Semedo ke tevgerê cinîyan ê kurdî, cinîyê Tirkîya dir bibo yew, do dînamîkêke pîl vejîyo werte. Nê bi rayîrê qeyûman ceribna. Komele padayî, la reyna nêbi. Semedo ke cinîyan her ware de têkoşîn kerdî. Ma reyke bîn vanê, 'ma fek têkoşînê xo ra vera nêdanê.' Ma semedê Pêkerdişê Stenbolî û cuya xo têkoşînê xo dewam kenê."

 

'Ma peyser gaman nêerzenê'

 

Endama meclîsê Partîya Demokratîke ya Şaran (HDP) Kadriye Ozguç zî dîyar kerd ke cinî fek destkewtişê xo ra vera nêdanê û vat: "Tîya ra tepya zî do hêrişê hemverê cinîyan zêde bibo. Hêrişê hemverê Komeleya Cinan a Rosa, sebebê pîlkerdişê têkoşînê ma yo. Tîya ra tepya prosesê semedê ma beno ke tewr giran bo. Ma nê hêrişan şermezar kenê. Ma peyser gaman nêerzenê. Yê ke vanê belkî ma do peyser gaman bierzê, wa bitersê. Do vengê tewr zêde xurt vejî yo. Kesê ke ameyê destbendkerdene de dayîkê aştî zî estê. Yewin waştişê dayîkan oyo ke hêsrî nêrê varnayîş. Eke dewlete serewedaritiş û hêsirê dayîkan ra biterso; esas de hetê ma de qedayîyo. Nê hêrişî do tu netîce nêdo."