Rojda Aydin

 

ŞIRNEX - Dayîka Nîhat Malgaz ke zîndan de yo Rahmete Malgaz, bale ant serê tecrîd û binpaykerdişê heqanê zîndanan û vat: "Tedayê serê tepişteyan roj bi roje zêde benê. Ma vanê êdî bes o. Wa waştişê tutanê ma bi ca bîyarê. Ma nêwazenê ke weşîya tutanê ma grevê vêşanîye de xira bibo."

 

Şert û mercî roj bi roje zîndanan de giran benê. Hemverê nê şertê giranan û tecrîdê serê Rayberê PKKyî Abdullah Ocalanî çalakîya grevê vêşanîye yê bêdem û bidor ke amebi destpêkerdene zî dewam keno. Dayîka Nîhat Malgazî ke 36 serrî ceza ci rê ameyo birnayene û 10 serrî yo zîndan de yo, Rahmete Malgaz reaksîyon vera tecrîd û binpaykerdişê heqan ke zîndanan de yenê meydan da û bale ant serê zehmetîyê ke wexto ke şinê pêvînayîş ancenê.

 

Rahmete dîyar kerd ke nêheqîyêke pîl tutê ci rê ameyo kerdene û vat: "Lajê mi 2011 de bê sûc û guneh ame tepiştiş. Wexto ke ame tepiştiş 15 serre bi. Dimayê ke ame tepiştiş, pêwa ke emrê ey qij bi zî 36 serrî ceza ci rê ame birnayene û lajê mi 6 serrî zîndanê Sêrtî de mend, dima ra ey surgûnê Zîndanê hûmara 2 yîn yê Bandirmayî kerdî û hema eynî zîndan de yeno tepiştene."

 

'Tutêko 15 serrî rê senî 36 serrî ceza birnenê'

 

Rahmete dîyar kerd ke lajê aye bi hawayêke bêsûc 10 serrî yo mîyanê çar dêsan de yeno tepiştene û vat: "Serê tutanê ma de teda û zordarî xeylêk zêde yeno kerdene. Didanê lajê mi dejenê û ey nêbenê nêweşxane. Lajê mi di rey zî pirnika xo ra emelîyat bîyo. Ez wazena lajê mi berê nêweşxane û tedawî bikerê. Rewşa lajê mi baş nîya. Tena lajê mi ney, ez wazena pêro tutê ma bêrê veradayîş. Bi serran o serê ma kurdan de zulm û teda yenokerdene. Dewlete çi tutanê ma ra wazena. Hacetê ke ma tutanê xo rê erşawenê zîndan zî nêdanê înan. Eynî wextî de rojnameyan zî nêdanê înan. 36 serrî cezaya zîndanî ci rê birnayî. Tutêko 15 serrî rê senîn 36 serrî ceza birnenê."

 

'Cigêrayîşê viranî ma rê kenê'

 

Rahmete dewam de wina vat: "Gardîyanî xeylêk rey ma viran kenê û wina cigêrayîş kenê. Ez çend rey şîya zîndan semedê pêvînayîşî her rey eynî çî mi rê kerdî. Serê ma de çi esto, viran kenê û serê ma de cigêrayîş kenê. Ma nê qebul nêkenê û şermezar kenê. Semedo ke ma kezeba xo bivînê ma mecbûrê şêrê zîndan. Dewleta ke 36 serrî ceza da lajê mi bi no hawayê zulm bi ma kenê. Janê koronayî esto û ma semedê nê zî weşîye tutanê xo ra bi guman ê. Çira kesê ke edlîyê înan vera danê tutanê ma vera nêdanê. Wa berê zîndanan bêro akerdene. Semedê kurdbîyayîşê ma zulm bi ma kenê."

 

'Waştişê tutanê ma bi ca bîyarê'

 

Rahmete, bale ant serê tecrîdî û vat: "Semedo ke tecrîd bêro şiknayîş zîndanan de çalakîya grevê vêşanîye ameya destpêkerdene. Semedo ke serê tepişteyan de zulm yeno kerdene vera nê bedenê xo dayê vera vêşanî. Ma vanê, êdî bes o. Wa waştişê tutanê ma bi ca bîyarê. Ma nêwazenê reyna cenazeyî zîndanan ra vejîyê. Ma nêwazenê tutê ma bedenê xo bidê vera vêşanî. Semedo ke tutê ma vêşan manenê ma zî nêeşkenê çîyêk biwerê. Êdî hewn nêkeweno çimanê ma. Lajê mi serra 2019ine de zî kewt çalakîya grevê vêşanîye û o wext zî nêzdîyê hîrê çar mengî ci de mend. Wa hukmat vengê tutanê ma bieşnawo. Wa cewab bidê tutanê ma."

 

'Ma cuyêka azad û têduşt wazenê'

 

Rahmete, tewr peyîn qiseykerdişê xo de veng da ke wa pêro kesî vengê tepişteyan bi eşnawê û wina qedêna. "Wa sere de tepişteyê ke nêweşê û dima ra pêro tepişteyê sîyasî serbest bêrê veradayîş. Ma cuyêka azad û têduşt wazenê. Wa peynîya zulmî bîyarê. Wa berê zîndanan bêrê akerdene. Ganî pêro şarê ma wirzo serê lingan û vengê tepişteyan bieşnawê."