Medya Uren 

 

MÊRDÎN - Merkezê Kulturî yê Mezopotamya sezonê wisarî yê kursê hunerî akerd. Mamosteya muzîkî Sema Ozal Asî ke derheqê kursan de zanayîşê xo  pare kerd, veng da tut, ciwan û her kesî ke muracatê kursan bikerê.

 

Merkezê Kulturî yê Mezopotamyayî (NÇM) sezonê wisarî yê kursê hunerî akerd û muracatê kursan da destpêkerdene. Do merkezê kulturî pêwa asayîşo berz yê vera janê koronoyî kursê tembûr, gîtar, erbane, tîyatro û qoroyê tutan bido wendekaran.

 

'Ma semedê dersan amade yê'

 

Sema destpêkê qiseykerdişê xo de bale ant serê kursî û vat: "Ma sey merkezê  kulturî yê Mezopotamyayî dest bi kursê xo yê sezonê wisarî kerd. Semedê kursan heme amadekarîyê ma temam ê. Mamosteyê ma bendeyê wendekaran ê. Muracatê ma yê kursî dest pêkerdî û do heta di hewteyan dewam bikero. Hêvîdar a her kes beşdar bibo û dersan kêm nêmano."

 

'Ma do nêbê nêweşî, ma do bibê derman'

 

Sema dewam de wina vat: "Hemverê janî ma pêro tedbîrê xo girewtê. Amadekarîyê ma yê hetê weşîye de zî temam ê. Ma do her sinifike de qasê 3 yan zî 4 wendekaran bigîrê. Maske, dezefenktan û cîhazê adirpamitişî û çîyê semedê pakitî ma amade kerdê. Ma eşkenê bi zerrîyêka rehet dest bi musayîş bikerê. Ma do jan de nêbê nêweşî, ma do bibê derman. Semedo ke jan û problemê mîyanê komelî de rî dayê, benê sebebê xirabîyayîşê komelî. Hemverê nê probleman semedê hizûrî, muzîk derman o."

 

'Ma bendeyê şima yê'

 

Sema tewr peyîn qalkerdişê xo wina qedêna: "Xeylêk welatijî hetê ekonomî de zî problemê înan estê û ma zî pere nêgînê. La semedê debara sazgehî zî bibo, ma bendeyê hetkarîyeyê zî. Yê ke zerrîya înan ra yena, sazgehî rê hetkarî kenê. Prosesê muracatî di hewte yo. Ma bendeyê muracatê şima yê. Bê huner memanê."