Sema Caglak

 

AMED - Endama MED-DERî Mîne Karakaş bale ant serê înkarkerdişê ziwan û kampanyaya ziwanî û vat: "Hemverê înkarkerdişê ziwanî ganî cuya rojane biba kurdkî. Eynî wextî de hemverê polîtîkayê asîmîlasyonî ganî her kes wayîrê kampanya vejîyo."

 

Pêlê înkarkerdiş û asîmîlasyonê ziwanî her roje bi metodê cîya vejêno hemverê ma. Wedaritişê tabeleyê bi kurdkî yê şaristanê herême, wedaritişê xizmetê ke bi ziwanê kurdkî ameyîne dayene, çinbîyayîşê perwerdeyê bi ziwanê kurdkî, kêmbîyayîşê qiseykerdişê bi kurdkî û ûsn benê sebeb ke pêl bi pêl ziwan cuya rojane vinî bibo.

 

La pêwa astengî, asîmîlasyon û polîtîkayê taybetî yê serê ziwanî, xebatê tewir bi tewir zî yenê kerdene. Nê xebatan ra yew zî kampanyaya ke bi sloganê, “Wa ziwanê kurdkî bibo ziwanê fermî” û “Wa ziwanê kurdkî bibo ziwanê perwredeyî" ame destpêkerdene. Kampanya hetê Platforma Ziwanê Kurdkî û Torra Ziwan û Kulturê Kurdkî dir bi minasebetê 21ê Sibate Roja Ziwanê Dayîke ya Dinya, 22yê sibate de ame destpêkerdene. Kampanya hem kuçeyan de û hem zî ser online yena kerdene. Derheqê babete de endama Komeleya Cigêrayîşî yê Ziwan û Kulturê Mezopotamyayî (MED-DER) Mîne Karakaş ajansê ma rê qisey kerd.

 

'Semedê bîbayîşê ziwanî lazimîyêkê sereyîn o'

 

Mîne, dîyar kerd ke teda û bêtehemûlîyê serê ziwanê kurdkî her ke şino xo bi serebûtîyêk bîn ramojneno û vat: "Nê prosesî de xeylêk serebûtî û nêzdîbîyayîşêk hemverê ziwanê kurdkî ame kerdene. Nimûne; waştişê pawitişê bi ziwanê dayîke heqêke bingeyîn o, roniştişê vervatoxa demî ya Tevgerê Cinîyan ê Azadan (TJA) Ayşe Gokkan de ame astengkerdene. Sewbîna Farqîn de tabelayê bi kurdkî ameyî wedaritene û zîhnîyetê qeyûmî reyna bi bêtehemûlîyê xo yê hemverê ziwanê kurdkî ramojna. Pêwa nê heme serebûtî zî vatişê Wezîrê Tirkîya zî bi tu hawayî nîno qebulkerdene. Serê herra Tirkîya de xeylêk şarê cîya ciwîyenê û semedê bîyayîşê ê şaran heqê ziwanê dayîke lazimîyêke sereyîn esto."

 

'Hemverê hêrişan paştdayîşan kampanya lazim a'

 

Mîne dîyar kerd ke hemverê teda û polîtîkayê serê ziwanî ganî şarê Kurdî xo bikerê sey qalxan û vat: "Sey ma her wext vanê; ziwan bîyayîş û nasnameyê merdimî yo. Bi nê tedayan û hêrişan wazenê bîyayîşê şarêke werte ra wedarnê. Nê polîtîkayê asîmîlasyonî, qedexekerdiş û astengkerdiş pêro semedê na babete rol kay keno. La pêwa nînan ganî şarê Kurdî hemverê nê tedayan û polîtîkayê asîmîlasyonî xo ver bidê. Seke yeno zanayîş bi rayberîya Platformê Ziwanê Kurdkî û Torra Ziwan û Kulturê Kurdî 21ê Sibate Roja Ziwanê Dayîke ya Dinya de kampanyayêke îlan kerdî û 22yê sibate de dest bi kampanya kerdî. Na kampanya zaf girîng a û ganî wayîrvejîyayîşêko pîl bibo. Ganî kurdî bieşkê vajê, ez wazena bi ziwanê xo qisey bikerî û wazena bi ziwanê xo perwerde bivînî. Sewbîna ganî vajê, ez bi ziwanê xo biciwî. Bi nê nêzdîbîyayîşî zî ganî pêro kesî hemverê polîtîkayê çinkerdişê ziwanê kurdkî paştdayîş bidê na kampanya."

 

'Ganî keyeyî bibê sey mekteban'

 

Mîne, dîyar kerd ke keyeyî bibê mektebî û vat: "Ez zî sey endama MED-DERî veng dana pêro şar û dezgehanê ma hemverê hêrişan de bibê. Wa kûçe û wareyê bînan de bi ziwanê xo qisey bikerê. Lazim o ke pêro keyeyî açaryê mekteban. Keyeyê ma mektebê yewin ê. Na bebete de rol û mîsyonê keyeyan zaf bi girîng o. Ganî dayîk û pîyî sey mamosteyêke bêrê vînayîş û bi tutanê xo dir kurdkî qisey bikerê. Ziwanê xo bidê musnayîş."