MERKEZÊ XEBERAN - Vervatoxa TJAyî Ayşe Gokkan zîndan de yena tepiştene, semedê cinîyê Fîlîstînijan mektube erşawit û vat: "Tepişteyê kurdî û fîlîstînijî hemverê osmanîyan û sîyonîzmî de têkoşîn kerdî û semedê şarê Rojhilato Mîyanên rayberî kenê."

 

Vervatoxa Tevgerê Cinîyan ê Azadan (TJA) Ayşe Gokkan bi wesîleyê '17-24ê Nîsane Hewteyê Paştdayîşê Esîrgirewtişê Fîlîstînî’ ke bi vengdayîşê hemverê îşkence û bêhuqûqîyê sîstematîk yê zîndanê Israîlî de yenê ciwîyayîş de ame destpêkerdene, zîndanê Cinîyan ê Amedî ra tepişteyê Fîlîstinijan rê mektube erşawit.

 

Ayşe dîyar kerd ke tepişteyê kurd û fîlîstînijî hemverê osmanîyan û siyonîzmî têkoşîn kerdê hempar û semedê şarê Rojhelato Mîyanên rayberî kenê û xoverdayîşê azadîye yê tepişteyan selam kerd. Ayşe mektube de wina vat:

 

'Bi heqîqetî dir ameyî rî bi rî'

 

"Semedê cinîyê tepişteyî yê Fîlîstinî û tevgerê cinîyan...

 

Hêzê emperyal wexto ke muracatê çimsûrîyê ke welatê Kurdistan û Fîlîstnî çin bikerê, bi heqîqetêko texmîn nêkerdêne ameyî rî bi rî.

 

Dewletê emperyalî maskeyê xo vistî. Xoverdayîşê cinîyanê Kurdistan û Fîlîstinî, dirîyê dewletan vet werte. Belê beno ke wehşet û çimsûrîyê dewletan reyke de peynî nêbo, la dewletan zî ispat kerd ke mekanîzmayê wehşetî yê. Bi xoverdayîşê tepişteyê Kurdistan û Fîlîstînijî ke zîndananê Tirkiye û Israîlî de yê, bi xoverdayîşê cinîyê kurdan û fîlîstînijan lerznenê.

 

Ma 17ê Nîsane Roja Paştdayîşê Tepişteyê Fîlîstînijan de înan dir ê. Tepişteyê kurd û fîlîstînijî hemverê osmanîyan û sîyonîzmî de têkoşîn kerdî hempar û semedê şarê Rojhelato Mîyanên rayberî kenê.

 

Biciwîyo xoverdayîşê zîndanan

 

Yan azadî yan azadî.”