MELETÎ - Gulseren Akpinar ke bi dayîka mêrdeyê xo dir, rastê şîdetê komêke camêrdan ameye, dîyar kerd ke deheqê gumanbaran de gerre kerdê la xêrcê îfadegirewtişî zêdeyêr çîyêk nêameyo kerdene.

 

Tirkîya de qerarê serekkomarî dir Pêkerdişê Stenbolî ame feshkerdene, vatişê selahîyetdaran bêceza verdayîşê sucdaran rayîr ver bi kiştiş û şîdetê cinîyan akeno. Dewa Kepezî ya girêdayê qezaya Kurecîkî ya Meletî de cinîya bi nameyê Gulseren Akpinar 12ê nîsane de hetê komêke camêrdan ke merdimê mêrdeyê aye bî, kuwayîş werd. Sewbîna vistewreye aye zî kuwayîş werd. Gulserene roja serebûtî ajansê ma rê qal kerd û vat, keyayê dewe hemkarê hêrişê camêrdan.

 

'Hêrişê mi kerdî'

 

Gulserene dîyar kerd ke mêrdeyê aye binê daranê zerdelayî pak kerdêne û o wext camêrdê dewe rayîrê verê keyeyê ma padayî. Gulserene dîyar kerd ke aye zî înan ra vato, ganî şima rayîr panêdê û wina munaqeşe vejîyayo û vat: "Ez û camêrdo bi nameyê Haydar ma kewtî mîyanê munaqeşe. Kerra eşte mi. Mi vat, çîyêk wina meke. La pêwa nê serê mi de ame û mi dir munaqeşe dewam kerd. Dima ra serebût peynî bi. Ez şîya bidawî axur ke êm bidî heywanna. Teber ra veng ame. Ez paca ra ewnîya ke camêrd vistewreya mi ra nengan çîneno. Mi zî vat, 'şima şerm nêkenê, cinîya 80 serrî rê nengan çînenê?' Reyna hêrişê mi kerdî. Camêrdo bi nameyê Haydar kerra girewt û da sereyê mi ro."

 

'Ez o senîn asayîş de bî'

 

Gulserene dîyar kerd ke dimayê serebûtî keyeyê dewe zî ameyo û heqaret ci rê kerdo û vat: "Ma şî qerekole. Ma gerre kerd. La tena îfadeyê înan ame girewtene. Dimayê serebûtî keya mi ra vat, ‘bê terbîyetî meke, vernê de qiseykerdiş bimuse.' Mi zî keya ra vat, ganî ti zî karê xo bikerê. La keya vera ke serebûtî çareser bikero, serê ma de ame. Keya van, ‘ti nêeşkena karê mi ser o cipersayîş bikerê.' Gelo ez o senîn keyeyê xo de bi asayîş biciwîyî."