Derya Ren

 

AMED - Dewa Zorova ya Sûrê Amedî de leşkeran ciwanan meydanê dewe de kom kerdî, derb û tehdîd kerdî. Keyeyan vera nê reaksîyon vera rewşe dayî û dîyar kerdî ke ê tedayan ra nêtersenê û vat nê caardişî serrê 90an derbaz kerdê.

 

Dewa Zorova ya Sûrê Amedî de dêsêke de nuşteyê, ‘Ma qasê ke bimirê cuye ra hes kenê' amebi nuştiş û bi no semed ra leşkeran 14ê Nîsanê de eştibî serê dewe û pêro ciwanan meydanê dewe de kom kerdî. Leşkeran ciwananê ke meydan de kom kerd, derb kerd, dimara esparê wesayîtan kerdî û dewe ra dûrvistî. Ciwanê ke seranserê rayîrî rastê heqaret, tehdîd û vatişê nîjadperest yê leşkeran ameyî, dimayê demêke dima ardî dewe. Heto bîn ra zî leşkeran vat do qerekole dewe viraznê û nuşteyê serê dêsê zî boyax kerdî.

 

Ciwano ke rastê tehdîd û teda ame Firat Aslan dîyar kerd ke roja hedîse dewe de nêbîyo û dimayê ke keyeyê ci gêrayo ameyo û hetê leşkerê dewe ra dewe de ameyo tepiştene. Firatî dîyar kerd ke seranserê rayîrê rastê tehdîd û teda ameyo.

 

'Ma muracatê sucî kerd'

 

Yunus Aslan ke hetê leşkeran ra ame derbkerdene, bi hîrê birayê xo dir hetê leşkeran ra ameyo tepiştene û înan zî berdê verê ciwananê bînan ke meydan de kom kerdê û vat: "Hewl danê ke dewijan bitersnê. Dewijî polîtîkayê dewlete qebul nêkenê. Ma çar biran esparê wesayîtî kerdî. Her wext ma ra name waştêne. Dima ra vatî do qerekole viraznê. Ma derheqê kesê ke ma derb kerdî muracatê sucî kerd."

 

'Serrê 90an derbaz kerd'

 

Azîze Aslan zî reaksîyon ramojna û vat: "Keyeyê ma serûbinkerdene û tutê ma yenê destbendkerdene. Leşkerî semedê ciwanan bitersnê muracatê nê kenê. Reyan leşkerî yenê û heta şan de vindenê. Ma nêzanê ma ra çi wazenê. Çîyê ke ma ciwîyenê serrê 90an derbaz kerdê. Ma polîtîkayê pelçiqnayîşî qebul nêkenê. Wazenê ciwanan bitersnê û bikerê ajan. Ma nêzanê çi wazenê. Şukur ke dewa ma sere nêtewênena."

 

'Her kes bibo yew do nêeşkê wina bikerê'

 

Emîne Çîtak zî wina vat: "Leşkerî keye bi keye gêrenê ciwanan kom kenê. Ma nê qebul nêkenê. Ciwanê ma yenê derbkerdene. 15 ciwanî verê çimê ma de tepiştî û derb kerdî. Kerdî wesayîtan û tehdîd kerdî. Verêzî leşkerî ameyîne dewe û her kesî meydanê dewe de kom kerdêne. Çîyê ke ma nika ciwîyenê tewr xirab ê. Heqaret şehîdanê ma kenê. Ma nê senîn qebul bikerê. Ma qebul nêkenê. Eke her kes bibo yew do nêeşkê wina bikerê."

 

'Bi zanabîyayîş wina kenê'

 

Zal Çîtak zî yew ciwano ke hetê leşkeran ra ame derbkerdene derheqê serebûtî de wina vat: "Ez rastê şîdetê fîzîkî û tehdîdan ameya. Seranserê rayîrî leşkeran ez tehdîd kerda. Vatêne nameyan bide ma. Mi qebul nêkerd û înan heqaret kerd. Nengî çînayî. Bi zanabîyayîş verê xo dayî ciwanan."

 

'Ma înan ra nêtersenê'

 

Sabrîye Aslan zî dîyar kerd ke her wext serê ciwanê dewe de teda estê û vat: "Ma nêwazenê leşkerî bêrê dewe. Semedo ka ma kurd ê tedayan kenê. Ciwanê ma yenê tepiştene û derbkerdene."

 

Sultan Çetîner zî wina vat: “Mîyanê ciwanê ke ameyî derbkerdene de tutê mi çinbî. La çîyê ke ameyî ciwîyayîş bêhuqûqî yê. Ganî dewe de her kes bibo yew. Ma do her wext verê ciwananê xo de bê. Hewl danê bi çekan bitersnê la ma înan ra nêtersenê."