Sema Çaglak - Şehrîban Aslan

 

AMED - Nevîn Çiftçî karê mobîlya kena û semedê aye ganî cinî xo metodê cinsperestî ra bi xelisnê û vat: "Ez hemverê vatişê, 'no karê cinîyan nîyo, şo dikanê kuaforî abike tewr baş o' vejîyaya. Xora tu kes bi asanî nîno cayêke û wa cinî bîyayîşê xo her wareyî cuye de ramojnê."

 

Semedê cinîyan yew wareyêko tewr girîng, wareyê ekonomîye yo. cinîyê ke fikrê cinsperestî ra xelisnenê, xeylêk wareyê cuye de ca gênê û bi no hawa bîyayîşê xo karanê tewir bi tewir de ramojnenê. Nînan ra yew zî Nevîn Çîftçîya ke karê mobîlyakarî kena. Nevîna ke bi eslê xo Dêrsim ra ya bi 2 serrî yo Amed de ciwîyena. Nevîne ajansê ma rê qalê karê xo kerd.

 

‘Dayîka mi mi rê bî nimûne'

 

Nevîne destpêkê qiseykerdişê xo de bale ant serê karê xo û vat: "Tay pereye min ê komkerde estbî. Rastî de karêko bi no hawa qet hişê mi de çin bi. Labelê bi pêşnîyazê çend embazan de serê karê mobîlayakarî de fikrîyaya û kewta mîyanê cigêrayîşî. Dima ra mi dikanêke akerd û dest bi nê karî kerd. Destpêk de hemverê karî mi xeylêk nêzdîbîyayîşê cinsperest estbî. Yanî kesêke qebul nêkerdêne û bawer nêkerdêne ke cinîyêke karê mobîlya bikera. Her wext mi ra vatêne, 'no karê cinîyan nîyo, to kuafor abikerdêne hîna baş bîne.' La pêwa nê nêzdîbîyayîşanê cinsperestî mi fek karê xo ra vera nêda. Dayîke mi her wext ma rê qalê têduştîyê cinî û camêrdan kerdêne û goreyê aye mîyanê karan de cîyabîyayîşê cinî û camêrdan çin bi. Mi dayîke xo ra nimûne girewt. Semedo ke mi waşt qalibê cinsperest yê serê xebata cinîyan de bişikinî."

 

‘Ez karê xo ra hes kena'

 

Nevîne dîyar kerd ke aye bi karê xo kêfweş a û vat: "Hişmendîyê serdest yê camêrdan vindertişê mi qels nêkerd. Semedo ke goreyê mi hem cinî, hem zî camêrdî eşkenê eynî kar bikerê. No kar xeyalo mi nêbi. La mi gamêke eşt û nika karê xo ra zaf hes kena. Helbet xidarbîyayîşê nê karî zî estê. Semedo ke xebate camêrdan dir raştî zî zor a. Çi heyf hema zî karê bi nê hawayî de xebata cinîyan pîyasa de hetê camêrdan ra nêameyê tesdîqkerdene. Mi xeylêk rey waşt cinîyan dir bixebityî. La çi heyf no nêzdîbîyayîş mîyanê camêrdan de esto. Cinîyan de zî eynî hişmendî esto. Xeylêk cinî vanê, 'no karê camêrdan o, ma do senîn kar bikerê?' Semedo ko no hişmendî nêşikêno, xeylêk karan de camêrdî estê."

 

'Wa cinî bîyayîşê xo her ware de ramojnê'

 

Nevîne tewr peyîn wina vat: "Çend roj verê semedê girewtişê hacetê dikanî ez şîya verê esnafêkê. Camêrdî mi ra wina vat, 'xora cinî karê xo de durist ê, sey esnafê camêrdan nîyê.' Yanî bawerîya înan esnafê cinîyan rê yeno. Ma reyke bîn zî vînenê ke eke cinî biwaza, eşkena heqê heme çî de vejîya. Bawerîya mi bi nê esta ke cinî, camêrdan ra hîna hêzdar ê. Şaşitîyêke xeylêk pîl serê komelî de esto ke cinî hêz û îradeyê xo ra bawer nêkenê. Her wext xo sepernenê camêrdan. Hemverê cinîyan de la no beno astengî. Coka ez her wext vana, eke cinî biwaza to hêzêke nêeşkeno vera ci de vindero. Wa cinî her wareyî de bixebityê. Bîyayîşê xo her ware de ramojnê."