RIHA - Çalakîya edaletî ya Emîne û Ferît Şenyaşar roja 41ine de ya. Emîne û Ferît semedê qedexeyê tebervejîyayîşê kuçeyan çalakîya xo keye de dewam kenê.

 

Emîne Şenyaşar ke mêrde û di lajê xo hêrişê AKPyijan de Pirsûsî de vinî kerd, lajê xo Ferît Şenyaşar 41 rojî yo verê Edliya Rihayî bi waştişê “Edaletî” çalakî kenê. Keyeyê Şenyaşarî semedê qedexeyê tebervejîyayîşê kuçeyan nêşi verê Edliye. Emîne û Ferît Şenyaşar keye de nobeta xo ya edaletî dewam kenê.

 

Keyeyî serê hesabê xo yê Twîtterî dîmenê wextê hêrişê serê kargehê xo pare kerdî û vatî: "Heyetê dadgehe dîyar nêkerdo ke hêriş kamî kerdo. Bi ewnîyeyîşê şima goreyê kamera teberî gelo hêriş hetê di kesê ke zereyî de yê ameyo meydan yan zî hetê merdimanê keyeyê Yildizî ke her ke şino hûmara înan zêde bena ra ameyo kerdene? (Eke keso tîşort zerd reye 2yîn nêkewtêne zere û hêriş nêkerdêne do tu kes nêmerdêne.)