Sema Çaglak

 

AMED - Dayîkê tepişteyan dîyar kerdî ke ganî waştişê tepişteyan bêrê qebulkerdene û vatî: "Hem tepişteyî û hem zî keyeyî binê zulmî de yê û hemverê zulmî nika tepişteyî xo ver dan. Ganî şar zî hemverê zulmî wayîrê grevê vêşanîye vejîyê."

 

Çalakîya grevê vêşanîye yê hemverê tecrîdê serê Rayberê PKKyî Abdullah Ocalanî û binpaykerdişê heqê tepişteyan 27ê teşrîna peyêne 2020 de zîndananê Tirkîya û herême de amebi destpêkerdene dewam keno. Nê dir tedayê serê tepişteyan zêde beno. Tewr peyîn Zîndanê Amedî û Zîndanê Xarpêtî de sereştişê koxuşan de hêrişê tepişteyan kerdî.

 

Pêwa teda û zordarîyê hemverê tepişteyan, keyeyî zî wexto ke şinê pêvînayîşan bi tedayan dir rî bi rî manenê. Bi taybetî xeylêk keyeyî dimayê ke tepişteyê înan yenê surgunkerdene nêeşkenê şêrê pêvînayîşan zî. Hem keye û hem zî tepişteyî bi nê metodî bi îşkenceyî dir rî bi rî manenê. Nînan ra yew zî keyeyê Necîme Yaşarer û Zelga Ayaze yo.

 

Necîme, hem lajê ci hem zî mêrdeyê ci tepişte yê. Lajê aye Selehattîn Yaşarer Zîndanê Dîlokî yê Tîpê L de 7 serrî yo tepişte yo. Selahattîn çalakîya grevê vêşanîye yê 27ê teşrîna peyêne 2020ine de ca girewt. Sewbîna mêrdeyê Necîmeye, Hîda zî tepişteyêko nêweş o û zîndanê Trabzonî yê Tîpê E de 5 serrî yo tepişte yo.

 

Necîme destpêkê qiseykerdişê xo de bale ant sereştişê keyeyî û vat: "Gama ke semedê lajê mi eştî serê keyeyî, keye serûbin kerdî. Dima ra lajê mi destbend kerdî û tepiştî. Ewilî zîndanê Amedî de bi, dima ra ey surgunê Zîndanê Dîlokî kerdî. Wexto ke semedê mêrdeyê mi zî ameyî, ez hewn de bîya. Wexto ke mêrdeyê mi ber akerd bi desan polîsî kewtî serê paşta ey û destê ci kelepçe kerdî. Pêro ferdê keyeyî odayêke de rêz kerdî û çek dayî sereyê ma pêrûne. Kênaya mi o wext zaf qij bî. Çek dayî sereyê aye û kênaya mi 3 mengî lal mende. Tersan ra nêeşkayîne qisey bikera.  Polîsan heqeret ma rê kerdî. Mîyanê keyeyî de çîyêk nêverdayî û her çî  şikinayî."

 

‘Moral û motîvasyon dano'

 

Necîme dîyar kerd bi 2 serrî yo ne lajê xo ne zî mêrdeyê xo vînena û vat: "Lajê mi hema destpêk ra tewrê çalakî bi. Semedo ke tewrê grev bîyê tedayê serê înan hîna bîyo zêde. Wexto ke bi rayîrê telefonî ma dir qisey keno tim bi moral o û omidê ci zaf o. Moral dano derûdorê xo zî. Nika zîndanê Dîlokî de yo û zîndanê uca bi îşkenceyan yeno naskerdiş. La lajê mi qet qalê şert û mercê zîndanî nêkeno. Şert û mercê ma zî çin ê ke ma her wext şêrê serdayîşê ey û wexto ke ma şinê zî bi tedayê gardîyanan dir rî bi rî manenê."

 

'Ma tena dewaya edaletî kenê'

 

Necîme tewr peyîn wina vat: "Ez veng dana heme şaran ke wa wayîrê pêro tepişteyan  û çalakîya grevê vêşanîye vejîyê. Ewro kezeba dayîkan veşêna. 3 tutê mi dinyaya xo bedilnayî. Mi dejê înan dî, ez nêwazena êdî dejê tutêke xo yê bîn zî bivîna. Ez vengdayîşê caardişê edalet, merdimayî û huqûq kena. Ma dewaya tu çîyêk nêkenê, dewaya  edalet û heqê xo kenê. Ewro edalet bîyo suc. Tewr zêde dayîkî zehmetî ancenê. Barê pêro çîyan serê milê dayîkan de yo. Zerrîya dayîkan wina bi kul û dej a."

 

'Wa êdî aştî û demokrasî bêro nê welatî'

 

Dayîka Mehmet Ayaz, Zelga zî dîyar kerd ke lajê aye 5 serrî yo tepişte yo û zîndanê Tîpê F yê Amedî de tepişte yo û vat: "Hesretê lajê mi her roja ke şino tewr zêde beno. Ma nêwazenê tepişteyî bi zulmî dir rî bi rî bimanê. Tepişteyê edlî heme ameyî veradayîş la yê sîyasî zî bi zulm û heqeratî dir rî bi rî mendî. Ma nê zulmî qebul nêkenê. Ma wazenê êdî tutê ma nê zulmî ra bixelisyê. Wa vengê înan bêro eşnawitiş. Hewn nêkeweno çimê mi. Lazim o ke êdî aştî û demokrasî bêro no welatî. Wa çareserîyêke pêroyî bi ca bêro."