COLEMÊRG - Hemsereka HDPyî ya Colemêrgî Humeyra Armut derheqê grevê vêşanîye ya tepişteyan ke dayê destpêkerdene de qisey kerd û vat: "Bicaardişê waştişan tena semedê înan ney, semedê komelêko demokratîk lazim o."

 

Greva vêşanîye yê bêdem û bidor ke bi amancê tecrîdo giran yê serê Rayberê PKKyî Abdullah Ocalanî bêro wedaritene 27ê teşrîna peyêne zîndanan de destpê kerd 150ine de dewam keno. Hemsereka Partîya Demokratîke ya Şaran (HDP) ya Colemêrgî Humeyra Armut derheqê tecrîd û grevan de qisey kerd.

 

'Tepişteyê nêweşî yê giran estê'

 

Humeyra dîyar kerd ke yewin waştişê tepişteyan oyo ke tedayê serê komelî bêrê wedaritene û vat: "Grevê ke ameyê destpêkerdene de sere de semedê tedayê serê zîndanan û tedayê serê pêro komelî bêrê wedaritene ameyo destpêkerdene. No ma keno mîyanê endîşeyan, ewro embazê ma  pandemî de kewtê grev. La tepişteyê ke nêweş ê û problemê cidî ciwîyenê estê."

 

'Tepişteyî binê rîskî de yê'

 

Humeyra dewam de wina qal kerd: "Ganî lezabez waştişê tepişteyan bi ca bîyarê. Ewro her çîyê ke zîndanan de biqewimyo ma berpirsîyar ê. Heqê tepişteyan estê û nê bi ca nêanê. Tena semedê  awanbîyayîşê komelêko demokratîk no lazim o. Xeylêk tepişteyê nêweşî binê  rîskî de yê. Bi pandemî dir no hîna giran bi."

 

'Her ca de teda esto'

 

Humeyra dîyar kerd ke ganî tepişteyê nêweşî rewşa normal de biameyîne veradayîşû vat: "Prosesê pandemî de û sewbîna bi grevan dir rîsk hîn giran bîyo, merdiman keno endîşe. Goreyê heqê merdiman ganî pêro waştişî bi ca bêrê. No zî ramojneno ke welat çiqas bêdemokratîk o.”

 

'Ganî waştişî bi ca bêrê'

 

 Humeyra tewr peyîn wina vat: "Nê prosesê pandemî de grevê vêşanîye bi rastî zî endîşeyan zêde keno. Rewşa tepişteyan bi taybetî zî yê nêweşan giran o. Zîndanan de koxuşêke de 30 kesî manenê û tedbîrî nînê girewtene. Tepişteyî şertên giranan de ciwîyenê. Waştişê ma oyo ke ma veng bidê vengê înan. Ganî semedê înan gamê lazimî bêrê eştene. Ganî pêro şertî verê çiman de bêrê girewtene û waştişî bi ca bêrê."