ENQERE - Dewaya Kobanê dest pêkerde. Bi desan avûkatî seba ke ca çîn o nêgerîyayî salone la herinda înan de polîsî ameyî cakerdene. Avûkatan vera nayî salone de nêrazîbîyayîşê xo mojna û salone terikna. 

 

Dewaya Kobanê badê 6 serran û 3 mengan ê serewedaritişê 6-8ê terşrîna verêne yo ke vera çeteyan DAIŞî semedê paştdayîşê Kobanê ame kerdene, dîyaye destpêkerdene.

 

Dewaya Kobanê ya ke 28ê ci tepişteyî 108 sîyasetmedarî yenê muhakemekerdene dest pêkerde. Roniştişo verên ê dewa Mehkemeya Cezaya Girane ya Enqere de û Kampusê Zîndanê Sîncanî de do yeno kerdene.  Hemserekê Pêroyî yê HDPyî, wekîlî, îdarekarî, avûkatî, dezgehê komelê sivîlî, temsîlkarê partîyan ê sîyasîyan û rêxistinan û teberî ra tay heyetî dewa teqîb kenê.

 

Pê bahaneya Korona avûkatî nêgêrîyayî salona mehkeme la herinda avûkatan de polîsê 'hêzê taybetî' ameyî cakerdene. Avûkatan semedo ke pêro embazê ci nêameyî girewtene salone de nêrazîbîyayîşê xo mojna û salone terikna.  

 

Sîyasetmedaranê tepişteyan Bulent Parmaksiz, Alp Altinors, Gunay Kubîlay, Nezîr Çakan, Mesut Bagçik, Zekî Çelîk, Ayşe Yagci, Bîrcan Yorûlmaz, Dîleke Yagli, Emîne Ayna, Emîne Beyza Ustun, Pervîne Oduncu, Sîbele Akdenîz, Ayla Akat Ata SEGBÎSî ser o rixmo ke vend dîya înan vengê xo nêkerd.  Sîyasetmedaranê tepişteyan SEGBÎSî ser o pê çepikan heyetê mehkeme şermezar kerd. Avûkatî zî tewrê protestoyî bîyî û înan da maseyan ro.  Mabênê heyetê mehkeme û avûkatan de nîqaş dewam keno. 

 

Avûkatê Wezaretê Weşîye, selahîyetdarê Wezaretê Karanê Zereyî, avûkatê Yasîn Boruyî, avûkatê AKPyî û Hur Davayî û avûkatê Mudirîya Asayîşî ya Polîsan zî salone de yê.

 

Reyna tay temsîlkarê partîyanê sîyasîyan û rêxistinanê heqanê merdiman dewa teqîb kenê.

 

Hemserekê Pêroyî yê HDPyî yê verê Selahattîn Demîrtaşî Zîndanê Tîpê F yê Edîrneyî û Fîgen Yuksekdag Zîndanê Hûmara 1 yê Kandirayî, Alî Urkut, Cîhan Erdal, Nazmî Gur û Ayhan Bîlgen Zîndanê 2yê Sîncanî û Emîne Ayna zî Zîndanê Cinîyan ê Sîncanî bi SEGBÎSyî beşdarê roniştişî bibê.

 

Eynî wextî de Hemşaredarê Bajarê Girdî yê Mêrdînî Ahmet Turk ke qeyûm tayînê cayê ci amebi kerdene, do bi SEGBÎSî 3in Dadgeha Cezaya Giran ya Mêrdînî beşdarê roniştişî bibo. Endamê Şandeyê Îmraliyî Sirri Sureyya Onder zî do 33in Dadgeha Cezaya Giran ya Stenbolî rê bi SEGBÎSî tewrê roniştişî bibo.