Sema Çaglak 

 

AMED - Baxçeyê Hewselî bi bereketê xo her wext bîyo çimeyê debara keyeyan. Bi ameyîşê wisarî dir keyeyî verê xo dayî Hewsel û dest bi ramitiş kenê.

 

Bi ameyîşê wisarî dir Baxçeyê Hewselî yê Amedî de demê ramitişî dest pêkeno. Baxçeyê Hewselî ke bi name û veng o, xeylêk keyeyan rê beno çimeyê debare. Keyeyî nika verê xo danê Hewsel û dest bi ramitişê zebze û zergûnayî kenê.

 

'Baxçeyê hewselî çimeyê debara ma yê' 

 

Hilmiye Aslan ke pîyazan ramnayîne qalê karê xo kerd: “Hewsel semedê m azaf bi qîmet o. Ez û mêrdeyê xo her serre wisar de yenê tîya û dest bi karê ramitişî kenê. Ma sebze qasê keyeyê xo danê ro. Dimayê ke pîl bî, ma kom kenê û yan wişk kenê yan zî wenê. Ma vernê de pîyaz dayî ro, dima ra xetî viraştî û şitilan danê ro. Firîngî, îsot, balîcan, zebeş, xiyar û kuye ma dayî ro. Helbet zehmetîyê karê ma esto la hetêk bîn ra zî kêfweşîyêk dano ma. Ma karê xo ra hes kenê."

 

'Dehlêre xemla Hewselî ya'

 

Makbûle Cengîz zî bi keyeyê xo dir ameya seyran û Makbûle bi taybetî dehlêran dir eleqedar bena, wina qalê dehlêran kerd: "Hewsel de tewr zêde darê dehlêrî estê û bi zergûnayîyê xo xeml danê Hewsel. Sewbîna xeylêk rew pîl bena, coka zaf yena ramitiş. Bi weşikbîyayîşê hawayî dir ma zî yenê tîya hem seyran kenê û hem zî dehlêran danê ro. Ma wareyê ke wişk bîyê vînenê û çiqilê daran danê ro."

 

'Karê baxçeyî kedêke pîl wazeno'

 

Yildiz Bartin zî dîyar kerd ke 2 mengî verê nika dest bi karê ramitişî kerdê û wina vat: "Karê baxçeyî hem zehmet o hem zî kedêke pîl wazeno. Eke merdim ci rê nêewno do baş nêvirazyo. Ma serê sibayî yenê heta şan de tîya xebityenê û nê karî dir eleqeda benê. Ma verê  kolenê, cayê înan viraznenê. Dima ra şitilan gênê û nê şitilan rêze xetan rê danê ro. Nika pîyazê ma zergûn bîyê. Ewro zî ma semedê ramitişê şitilê firîngî û balîcan û îsotan ameyî. Sewbîna roka û marulê ma zî zergûn bîyê. Tîya êdî semedê bîyo sey kulturêke. Xeylêk keyeyî yenê Hewsel. Gama ma karê xo kenê, bi keyeyê bînan dir zî kewenê têkilî û tîya zî wextê ma weş derbaz beno."