COLEMÊRG - Fazîle Polat, 4 serrî yo cenazeya lajê xo gêrena û vat: "Ez kulmêke welî bo zî cenazeya lajê xo wazena."

 

Ridvan Polato HPGyîj serra 2017ine de herêma Xerzanî de hêrişê hawayî de dinyaya xo bedilna. 4 serrî yo muracatê keyeyî de zî dozgerî cenaze nêda keyeyî. Keye bi israr waştişê cenazeya xo keno. Dayîka Ridvanî, Fazîle Polat ajansê ma rê qisey kerd.

 

Fazîle, dîyar kerd ke dimayê ke Ridvanî dinyaya xo bedilnayo, qereqola Geverî veng dayo keyayê dewe û Fazîle wina dewam kerd: "Bi rayîrê  keyayê dewe, veng dayî ma. Ma şî qereqole. Qerekole de persê sey, 'Senîn şi, kam ey berd?' kerdî. Dimayê 3 mengî ra dima, televîzyon de m afotografê ey dî û ma zana ke Ridvanî dinyaya xo bedilnayo."

 

Fazîle, dîyar kerd dimayê ke xebere dîyê, verê xo Bedlîs û wina vat: "Ma şî Bedlîs û ma muracatê cayê ke eleqedar bîne kerd û ma nimûneyê DNAyî da. Ma ra vatî, şêrê dimayê 3 mengî ra dima ma do zanayîş bidê şima. Dimayê 2 serran Serdozgerîya Komare ya Bedlîsî telefon akerd û ma ra vat, 'Şima keyeyê Ridvanî yê ney û bêrê Bedlîs'. Ma şî Bedlîs la ma ra vatî, kam telefon akerdo? Avûkatê ma înan ra vat, şima geyrayê û şima vato, 'Bêrê cenazeya xo bigîrê.' Bi vatişê dozgerî ma şî çend cayan la ma zanayîşêk nêgirewt. Goristan de numaraya ke dabî ma çinbî."

 

Fazîle, dîyar kerd ke tena waştişêke aye esto û wina qedêna: "Wa ma ra vajê ke lajê mi ça de yo. Kulmêke welî bo zî wa esteyê lajê mi bidê. Ez este û welîya lajê xo wazena. Ez wazena goristanêk ey bibo. Merdanê ma ra zî tersenê. Êdî bes o. Wa zerrîya tu dayîke nêveşo. Ez wazena aştî bêro."