Berçem Cûdî

 

KOBANÊ - Sereka Heyetê Cinîyan ê herêma Firatî Firyaz Berkel xoverdayîşê Şengalî selam kerd û vat: "Wayîrvejîyayîş û xoverdayîşê cinîyan ê Şengalî manayêka tarîxî esta. Coka ma a bawerî de yê ke do îradeyê Şengalî serbikewo."

 

Xoverdayîş û nêrazîbîyayîşê şarê Şengalî yê hemverê pêkerdişê hukmatê Iraqî yê destdayîşê serê Îdarekarîyê Xoser bi rojan o dewam keno. Sereka Heyetê Cinîyan ê herêma Firatî Firyaz Berkel rewşa Şengalî û bîyayîşê cinîyan ê xoverdayîşê ci de ajansê ma rê ercnayîş kerd.

 

'Nêzdîbîyayîşê hukmatê Hewlêr û Bexdayî nînê tesdîqkerdene'

 

Firyaze destpêkê qiseykerdişê xo de bale ant serê rewşa rewşa Şengalî û vat: "Şengal bi komployêkê dir rî bi rî yo. Hukmatê Iraqî planê destdayîşê serê Îdarekarîyê Xoser yê Şengalî dayo destpêkerdene. Verê ke merdim rewşa Şengalî nê demî de biercno, ganî destpêk de tarîxê Êzidîjan bîyaro xo vîr. Komelê Êzîdî tarîxê xo de 73 fermanan rê rî bi rî mendo. Bi taybetî zî fermano tewr peyîn yê hêrişê DAIŞî ke temamê dinya şahidî kerd. Ê qirkerdişî de rastîyê hukmatê Iraq û herêma Kurdistanî wayîrê Şengalî nêvejîyayî verê çimê her kesî de yo. Semedê nê eke dimayê xoserbîyayîş û xelisnayîşê Şengalî nê her di hêzî wayîrvejîyayîşê xo ramojnenê, no nêzdbîyayîş bi tu metodî nîno tesdîqkerdene."

 

'Xoverdayîşê cinîyan do serkewtiş qetî bikero'

 

Firyaze, bale ant serê rayberîya cinîyan ê Şengalî û wina vat: "Hêrişê 2014ine de tewr zêde cinî bi kerdişê wehşetî û teberê exlaqî de rî bi rî mendî. Remênayîş, tecawuz, rotiş, qetilkerdiş û ûsn. Heta na roje zî çarenûsê bi seyan cinîyan dîyar nîyo. Binê sîwanê Îdarekerdişê Xoser de cinîyê Şengalî xo bi rêxistin kerdî, hêzê xo yê leşkerî û komelî awan kerdî. Cinîyê Şengalî qerarê têkoşînî dayî. Coka merdim mohrê cinîya Êzîdî sîstemê Şengalî de vîneno. Coka rayberîya cinîyan de xoverdayîşê wayîrvejîyayîşê yê Şengalî manayêke xo ya tarîxî esto û hemverê hêrişê serê Şengalî de mesajê tewr bi hêz o. Ma zî paştdayîşê cinîyan ê Şengalî kenê û xoverdayîşê înan selam kenê."

 

'Bawerîya ma bi şarê Şengalî esta'

 

Firyaze Berkel tewr peyîn qiseykerdişê xo de paştdayîşê xo bi şarê Şengalî rê ramojna û vat: "Projeyê Neteweyê Demokratîk û Îdarekarîyê Xoser temamê dinya de bi nimûne. Semedê nê herêmê ma cîranê dewleta tirkî yê. Tirkîye zî her fersendî de hêrişê nê projeyî kena. Bawerîya ma bi şarê Şengalî dir esta. Bi taybetî zî xoverdayîşo ke cinî rayberîya ci bikerê, helbet do serbikewo."