MÊRDÎN - Zekîye Akçakale ke serrê  1993ine de bi zorê dewlete dewa xo ra koçber bena, dimayê koçberî 10 serrî dima agêrena serê herra xo û dest bi ramitişî kena. Zekîye keye û bi karê ramitişî dir kedêke pîl dana vana, keda cinîyan nîna vînayene, la herre cinîyan rê heme çî ya.

 

Zekiye Akçakale (70) dewa Talatî ya girêdayê qezaya Nisêbînê Mêrdînî ra ya. Talatî zî yew dewêka serrê 1993ine de bi zorê dewlete ameya vengkerde ya. Xeylêk welatijî derbasê metropolê tirkîya bî. Zekiye Akçakale zî yew ê keyeyan ra ya ke sere vera dewlete nêtewênenê û koçberê Îzmîrî benê. Îzmîr de herre xo ra dûrî cuyêke awan kenê. Dimayê 10 serran manenê Zekîye êdî wazena agêro dewa xo. Zekîye rexmê temenê xo ramitişî serê 37 donimî erdê xo kena.

 

'Herra merdimî her çî merdimî ya' 

 

Zekîye bi meqesê xo vaşbirnayîşî dir mîyanê bostanî de daran dûz kena. A mabêne de zî ma rê qalê xo kerd û vat: "Ma bîyayîş ra heta nika mîyanê xoza de bi nê karan dir meşgûl benê. Yan ramitişî yan pesdewarî kenê. Koçberîyê serra 93ine ma rê giran ame. Zaf tesîr serê ma de kerd. Ma kewtî mîyanê feqîrî. Tutê mi qij bî. La dima ra ma reyna agêrayî serê herra xo. Ma rê herre heme çî ya. Visnayîşê aye ra ma rê merg o."

 

'Ez 37 donimê erdî bi tena viraznena'

 

Zekîya wina qalê karê xo kerd: "Ma vernîya ke roj vejîyo wirzenê. Ma keye de arayî kenê. Ez û mêrdeyê xo tena yenê. 37 donim erdê ma esto, ma tena ramitiş kenê. Emrê mi 70 yo û ê mêrdeyê mi zî şino 77ine. O qet nêeşkeno bixebitî yo. Ez vame, mişmiş, miro û sayan ramnena. Heta şan de mîyanê rezan de ya. Hetê şanî ra ez şina keye û na rey zî dest bi şutişê cilan kena, werd amade kena û pakitî kena."

 

'Karê cinîyan nêvînenê'

 

Zekîye wina dewam kerd: "Karê mi qet nêqedîyo. Ramitiş biqedo ez o dest bi ramitişî bikerî. Ez na rey engure, bastêq viraznena. Ez fêkîyê bînan zî komkena û tutanê xo rê vila kena. Karê cinîyan her wext nêvînaye ameyo vînayene. Çi heyf, ê ma zî wina yo. Hetêk ra zî xoza keda mi rê bena cewab. Zerrîya mi rehet a, ez pê bi hizûr bena. Binê nê daran de wext rew derbaz beno."

 

'Roja kedkaranê cinîyan pîroz ba'

 

Zekîye tewr peyîn wina vat: "Ez sey cinîyêke, mi tutîya xo ra xêrcê karî çîyêk bîn nêdîyo. Camêrdo ke bi hêzê xo serdestî serê mi de keno, bi qasê çarêke mi nêeşkeno bixebityî. Nika ez 37 donim erd raminena û ser de zî temaşe kena. Cinî bi hêz ê, camêrdan ra tewr bi hêz ê. Bi taybetî zî demo ke babete biba xoza, cinî serkêş ê. Keda cinîyan pîroz a. Semedê nê zî cinî tewr zêde pîrozkerdiş heq kenê û tewr zêde roja înan pîroz bo."