Medya Uren

 

MÊRDÎN - Karkerê mewsîmî yê ke ramitişê kartol û xiyaran kenê vanê, ma heqdestê keda xo tam nêgînê, la îqtidar berardişê keda ma zaf bi asan vila keno. Karkeran vatî wa vera kartolan paştdayîş bidê karkeran û wayîrê erdan.

 

Tirkîya de her ke şino krîzê ekonomî girs beno û bi taybetî zî wayîrê erdan yê ke bendeyê paştdayîşî yê zehmetîyan ciwîyenê. Yê ke kede danê û zehmetî ancenê ê yê zî la heqdestê keda xo ne tam ê gênê ne zî karkerê ke înan dir xebityenê. Îqtidarê AKPyî yê Mêrdînî mîyan de xeylêk şaristanê kurdan de kartol welatijan rê vila kerd. La karkerê mewsîmî hemverê nê bi reaksîyon ê  û vanê vera vilakerdişî paştdayîş bidê xebatkarê ke mecbûr ê şefeq ra heta şan de ramitişê kartolan kenê, bikerê. Karkeran vat, ê feqîr ê ganî hetkarî ne bi vilakerdişê kartolan bi hawayêke cidî bêro kerdene. Înan vat, heta şan de vrê tijî de yê û hemverê keda xo nêgînê.

 

'Ma nêeşkenê bi keda xo teneyêke rûn bigîrê' 

 

Medîne Ozcana 60 serrî rexmê emrê xo hema nê karî kena û qalê zehmetîyê karê xo kerd: "Ma şefeq de dest pêkenê, heta ereyê şewe verê tîjî de dewam kenê. Ma binê şert û mercê zehemetan de xebityenê, la çi heyf, ma hemverê keda xo zî nêgînê. Şefeq ra heta şan de ma 70 lîrayê tirkî gênê. Roja ma bi teneyêke rûn zî nîno. Ancax ma 4 rojan xebityê ke ma bi eşkê teneyêke rûn bigîrê. Ma tutîya xo ra yenê. Verê ma şîne teberê şaristanê. Nika zî tîya kar biqedîyo ma mecbûr ê şêrê teberê şaristanî. Nika no îmkanê ke ma nêzdî de xebityenê şansêke yo."

 

'Ma vêşan ê, kîloyêk kartol ma mird nêkeno'

 

Medîne dewam de wina vat: "Ganî dewlete paştdayîş bida wayîrê erd û  karkeran. La her rey karkerî yenê xovîrrakerdene û ê feqîrî zî ê yê. Krîzê  ekonomî yeno la kes halê ma nê krîzî de nêzano. Ma vêşan ê. Kîloyêk kartol ma mird nêkeno. Ma tîya nê zehmetî ancenê, uca de zî kartolan vila kenê. Ma kar wazenê, ma wazenê îmkanî bêrê awankerdene. Herra ma zî dewlemend a. Paştdayîş wa bidê citkar û wayîrê erdan."

 

'Ma hemverê keda xo nêgînê' 

 

Gulîstan Esen verê cu şaredarî de xebityayîne la dimayê ke qeyyûm tayînê şaredarî ame kerdene, aye zîkar ra ameye eştene. Gulîstane wina vat: " Ez dayîka 4 tutan a. Mi dewaya verdayîşî dabî destpêkerdene. Prosesê min o tewr xirab de mi kar ra eştî û mi mexdûr kerdî. Ez semedo ke tutan pîl bikera, bi şew û roje erdan de xebityena. Ez reyna nêeşkena debara xo bikera. Ma nêeşkenê sey înan dizdî zî bikerê. Homa înan rê nêverdo. Her roja ke tutê mi vêşan manenê, wa gunayê înan milê kesê ke bîyê sebeb de bo. Semedo ke ez şefeq ra heta şan de mîyanê herre de ya û hemverê ci zî kêm gêna."

 

'Ma kartol û pîyazan nêwazenê'

 

Gulistane wina qedêna: "Serre ra 6 mengî ma xebityenê û mengê bînan zî pereyê ma kom kerde, ma wenê. Sewbîna ma kewenê binê deynan zî. Ma qalê debare kenê. Şinê kartol û pîyaz şarî rê vila kenê. O şar nêeşkeno rûn bigîro ke kartol û pîyazan virazno. Nê şov û zûrî yê. Ma karkerê erdan ê. Ma vêşan ê. Bi serran o kesî vengê ma nêeşnawit û her ke şino rewşa ma tewr xirab bena. Ma kartol û pîyazan nêwazenê. Ma zûranê şima ra mird bîyê. Eke şima rast ê kar bidê ma."