ÎDIR - Cinîyê ke her serre nê mewsîmî de dest bi ramitişê bostanî kenê, toxum eştî herre. Îdir de cinîyan dest bi ramitişî kerdî, cinîyan dîyar kerd ke semedê her çî kede lazim a.

 

Bi ameyîşê wisarî dir herre hewnê zimistanî ra aya bî, dar û vilî abî. Her serre nê mewsîmî de ramitiş dest pêkeno. Cinî rew kewtî tevger û toximê xo eştî erd. Yew şaristanê herême ke herra ci xeylêk dewlemende ya nînna ra yew zî Îdirî ya. Îdir de goreyê xeylêk cayan tewr lez ramitişê bostanan dest pêkeno. Dewa Yukari Çamurlu yê qezaya Aralikî ya Îdîrî cinîyan dest bi ramitişî kerdî.

 

'Ma goreyê lazimîyê xo raminenê'

 

Cinîya bi nameyê Bedîha Alagoz ya 63 serrî dîyar kerd ke her serre bostan ramnena û vat: "Herra ma dewlemend a. Xeylêk fêkî û sebze resenê. Ma her serre toximê berardişê xo nimnenê û serra bêro erzenê. Her kes goreyê lazimîyê xo ramneno. Her keye ramneno. Dewijî bi pesdewarî debara xo kenê. Semedê nê zî goreyê xo ramnenê. Zêde bo zî ma danê cîranan."

 

'Berardişê ke yenê rotene ma nêweş kenê'

 

Bedîha dîyar kerd ke ramitişê bostanî zehmet o û vat: "Ez roje ra reyke şina bostan. Menga teşrîna verêne de di rey yeno kolnayene. Wexto ke bêro kolnayîş herrî newe bena. Ez hewte ra reyke bostan awe dana. Emsar ez îsot, balîcan, firingî, bamya, fasulye, kuwe, pîyazan ramnena. Bê hormon ê. Çîyê ke ma gênê ma nêweş kenê. Ma sebzeyê xo yê zimistanî zî vejenê."

 

'Semedê her çî kede lazim a'

 

Gulîstan Alagoz zî derheqê ramitişê bostanan de qisey kerd û dîyar kerd ke barê giran serê milê cinîyan de yo û vat: "Cinî heywenan rê ewnîyenê. Karê keyeyî kenê. Şinê zozanan û bostan ramnenê. Pîyê mi 10 donim erd kerdêne bostan. Me mengêke kolnayîne. Ez nika goreyê xo ramnena. Karêko zehmet o. Wexto ke berardiş zêde bo ma roşenê. Danê cîrananê xo. Şîyayîşê bostanan çin o. Her çî kede wazeno. Kede çinî bo, hemverê ci zî çin o."