Medya Uren

 

MÊRDÎN - Taxa Yalimkoyî ya girêdayê qezaya Artukliyî ke semedê problemê rayîro xirabe, tutî zî tede xeylê welatijî qeza derbas kerdê û birîndar bîyê. Roniştixê taxe vera şaredarîya ke rayîr nêviraznena, reaksîyon ramojnayî û vatî: "Semedê asayîşê pêro roniştixê taxe, lazim o dest bierzê kuçe û viraznê. Şaredarî berpirsîyar a ke xizmetê şarî bikera."

 

Taxa Yalimkoyî ya ke girêdayê qezaya Artukliyî ya Mêrdînî de ya, 2 serrî yo welatijî waştişê viraştişê rayîrî kenê. Semedê ke rayîrê înan bêro viraştene, heme rayîrî ceribnayê la şaredarî bêveng manena. Welatijî bi reaksîyon ê û waştiş kenê ke şaredarî lezabez karê xo bikera.

 

Kuçeyê 215î Taxa Yalimkoyî ke keweno serê rayîrê mekteba sereyîne û eynî wextî de serê rayîrê şîyayîşê bazarî yo. Welatijî 4 serrê peyînî her wext şinê şaredarî û waştişê viraştişê rayîrî kenê. Şaredarî vana, 'no karê ma nêyo û ganî taxe mabêne xo de pere kom bikera û virazna.' Netîceyê şîyayîşî û ameyîşî de zî xeylêk welatijan qeza derbas kerdê û birîndar bîyê.

 

'Şaredarî karê xo nêkena'

 

Muzazez Çelik vat, şaredarî berpirsiyar a ke xizmetê şarî bikera û vat: "No kuçe tewr zêde yeno xebitnayene yo û merkezê şaristanî de yo. Rexmê israran zî şaredarî karê xo nêkena û nêviraznena. Semedê asayîşê roniştixê taxe ganî bivirazê. Wazenê ma mîyanê xo de pere kom bikerê ûû viraznê. Pereyê ma çin o ma kîrayê xo bidê ke ma na rey bêrê rayîran viraznê. Şaredarî berpirsiyar a ke xizmetê şarî bikera. Ma zî wazenê ke rayîrê ma bêrê viraştene."

 

'No rayîro tewr zêde yeno xebitnayene yo'

 

Emîne Alak wina qal kerd: "Ma wazenê ke demêk nêzdî de bêro viraştene. No rayîrê ma yê bazarî yo û her roje bi desan tutî şinê mektebe û yenê. Wexto ke tutî şinê, ma tersenê çîyêk bibê. Ma xeylêk tewir muracatê şaredarî kerd. La bi tu hawa cewabêk nêame. Şaredarî bi israr bêveng manena. Gelo çi pawena? No karê şaredarîye yo û nêkena."

 

'Şima pabeyê qezayê tewr pîlan ê?'

 

Guneş Alak zî wina reaksîyon ramojna: "Sey her rey eynî derd û eynî aciziyê ma estê. Rayîrê Mêrdînî yê ke her wext problem ê, ewro zî problemê ma yo tewr pîl o. Ma şaredarîya pîl a Mêrdînî ra gerrekerdox ê. Bi serran o ma bendeyê ke nê rayîrî viraznê. Her roje nê rayîrî xebitnenê. Semedê şîyîş û ameyîşî ma tengî ancenê. Ma bi hetkarîya çend kesan şinê bazar yan zî bar ancenê. Ma heta ke çîyêk bêro sereyê tutan yan zî pîlan do hema newe viraznê? Şima pabeyê qezayê pîlan ê?"

 

'Şaredarî pere ma ra wazena'

 

Gulîzar Îpek zî wina vat: "Fermî de ma sey kuçeyêk yenê vînayene. Wextê ke şima xerîtera biewnê, şima do bivînê. Rast o, rayîro tewr bi çalak ke yeno xebitnayene yo. Ma bi ters ser de şinê, yenê. Her roje tutê ma serê nê rayîran û kuçeyan de yê. Beno ke tutê ma bikoyê. Heta nika bi desan tutî, verê çimanê ma de tîya gunayê erd ro. A roje zî pîrêkêke kewte û çokê aye şikiya. Şaredarî ma ra vana pere kom bikerê. Ma do senîn pere kom bikerê? Heme welatijê ke tîya nişnenê ro, feqîr ê û rewşa înan dîyar a. No zî karê şaredarîye yo."

 

'Rayîrêk bîn çin o'

 

Zehra Alak dîyar kerd xeylêk rey reaksîyon ramojnayê û vat: "No reya ewil nêyo ke ma reaksîyon ramojnenê. Ma waştişname da, ma bi xo şî. Ameyî ewnîyayî û şî. Çîyêk bîn nêkerdî. Tîya tutê mi, wayê û birayê mi şinê mektebe. Xeylêk rey tîya qeza derbaz kerdî. Dorê keyeyê ma padayeyê, rayîrêk bîn çin o. Verê sînorê nê awanî nêzdîyê rayîrî bi û kilm bi, ma uca ra şîne û ameyîne. Uca zî padayê û no rayîr tena mendo. Çi heyf, o zî na rewşe de yo."