RIHA - Emîne û Ferît Şenyaşar yê ke verê Edlîya Rihayî de çalakîya nobeta "edaletî" organîze kerdî, semedê qedexeyê tebervejîyayîşê kuçeyan çalakîya xo keye de dewam kenê.

 

Emîne Şenyaşara ke laj û mêrdeyê ci hetê merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde 58 rojan ra nata nobeta edaletî de ya. Şenyaşarî semedê qedexeyê tebervejîyayîşî keye de nobete rê dewam kenê.

 

Ma fek dewaya xo ra vera nêdanê

 

Keyeyî serê hesabê xo yê medyaya dîjîtalî de wina vatî: "Kesê ke ameyoxê ma, xeyalanê ma û cuya ma diznayî, nika bêrê pawitene zî do rojêke hesab bidê. Ma fek dewaya xo ya heqdare ra vera nêdanê. Ma bêveng nêmanenê."