Medya Uren

 

MÊRDÎN - Derya Dal û Yekta  Zangirti derheqê betalkerdişê Pêkerdişê Stenbolî de reaksîyonê xo ramojnayî û vatî ke betalkerdiş de amanc xirakerdişê hizûrê komelî yo û wina vat: "Heta o pêkerdiş reyna nêarê, ma do meydanan de bê û heqanê xo bipawê."

 

Tirkîya de Pêkerdişê Stenbolî ke semedê cinîyan zaf girîng o antî û hemverê antişî reaksîyonê cinîyan bi eşkerayîye, çalakî, şermezarkerdiş dewam keno. Aktivîsta Tevgerê Cinîyan ê Azadan (TJA) û eynî wextî de Hemsereka qezeya Qoserî ya HDPyî Yekta Zangirti û endama Platformê Cinîyan ê Şahmaranî Derya Dal derheqê qerarî de antişî yê  Pêkerdişê Stenbolî de ajansê ma rê qisey kerdî.

 

'Her roje 3 cinî yenê qetilkerdene'

 

Yekta Zangirti destpêkê qiseykerdişê xo de bale ant serê zêdebîyayîşê qirkerdişê cinîyan û wina vat: "Polîtîkayê hêrişê taybetî yê serê herêma ma û îdareberdişê cinsperest û nîjadperest ê tirkîya hizûrê komelî xira keno. Ma vînenê, her roje tewr tay 3 cinî yenê qetilkerdene û bi seyan serebûtî, deteştiş û tecawuzî yenê kerdene. Cayê ke vernîya nê serebûtan rê bibê asteng, înan rê benê hetkar. Hemverê astengkerdişê qetilkar û tacawuzkar yenê xelatkerdene. Xelata înan ê tewr pîl zî betalkerdişê Pêkerdişê Stenbolî bi. Ganî pêkerdiş bi ca bêardêne. Ancax bi nê rengî vernîya qirkerdişî bi ameyîne padayîş."

 

'Dişminîyê cinîyan yeno kerdene'

 

Yekta tewr peyîn wina vat: "Pêkerdiş, hemverê şîdetê mîyanê keyeyî û komelî de qalxanêk bi. Wazenê nê qalxanî û cinî bê war verdê. Pêkerdiş mîyanê rojêke de nêameyo qezenckerdene. Netîceyê têkoşîn û gonîya cinîyan de ame bidestkerdene. Îqtidarê AKPyî û MHPyî şewêke de xo peyser ant. No raste rast dişminbîyayîşê cinîyan o. Çiqas ma zor bi dest kerdibi, ma asan zî vera nêdanê. Bi betalkerdişî dir çîyêk nîno vurnayene. Bê guman ma do têkoşîn bikerê û hemverê nê hêrişan seknê xo ramojnê."

 

'Cinî tehluke de yê'

 

Derya Dal zî bale ant serê pêkerdiş û pandemî û vat: "Yeno zanayene bi pandemî dir keyeyê ke tewr zêde şîdet cinîyan rê yeno kerdene, bi cehenemê înan. Cinî mîyanê şîdetî de çar dêsan de mendî. Cuya bi hezaran cinîyan mîyanê tehlîke de yo. Cinî asayîş de nêyê. Cinî bi qetilkerdoxan dir eynî ca de hetê dewlete ra yenê tepiştene. No cînayetêk bi destê dewlete ameyo kerdene yo. Bi polîtîkayê bêcezabîyayîşî û feshkerdişê Pêkerdişê Stenbolî dir dişminîyê xo eşkera kenê. La cinî qet meydanan ra xo nêancenê. Ma do semedê heqê xo û nasnameyê xo yê cinsî tîya de bê. Heta ma reyna pêkerdiş nêarê, ma do cayêk ra nêşêrê."