Melîke Aydin

 

MUGLA - Duygu Yildiz dîyar kerd ke Burçîn Akinci ke aye girewto kar, desteştiş û tehdîd kerdo û wina vat: "Mi gerre kerd la mi netîceyêk nêgirewt. Ganî cinî hemverê şîdetî ke vînenê bi cesaret tê bigeyrê."

 

Cinîya bi nameyê Duygu Yildiz serrêke verê bi pêşnîyazê nasêke xo, Şîrketê Anka Çîm Peyzaj Gubreyî de dest bi kar kerd. Duygu hetê keso ke kar dayo ci rastê desteştişê cinsî, şîdet û vatişê nîjadperest ameye. Duyguye çîyê ke ciwîya ajansê ma rê qal kerd.

 

Tehdîd û desteştiş

 

Duyguye dîyar kerd ke bi hemkarîya nasêke xo dest bi kar kerda la camêrdo bi nameyê Burçîn Akinci aye girewto kar rastê desteştişî ameya û vat: "Mi dest bi kar kerd, çend rojî dima roja şeme ez wesayîtê serwîsî de bîya. Pêro xebatkarî vila bî, ez û o tena mendî. Burçîn Akin dekewtişê Bodrumî de cayêk bêveng de vindert û ez bi hacetêk birnayene tehdîd kerda. Wexto ke mi girewt kar vat ke verê mi de bimane û notan bigî. Vat, ‘cayê ke ez ci ra talîmatan gêna estê, ê çi vajê ez wina kena.' Mi ra waşt ke ez çek bixebitna, heta vat ke ganî cînayetêk bikerê. Mi vat, ez bi tu hawa qebul nêkena. Gîştaneyê xo mojna, ser de estere û aşmî bî. Zanayîne ez Amed ra ya. Beno ke semedê mi bitersno wina kerd. Bi lajê mi ez tehdîd kerda. Zanayîne ez qebûl nêkena. Verê ma qisey kerdibiç Zanayîne lajê mi esto. Vat, ez çi vaja ganî ti bikera. Wexto ke qalê lajê mi kerd, mi qebûl kerd. Wexto ke mi vat ez qebul nêkena, desteşt mi."

 

'Vat çek bixebitne'

 

Duyguye dewam de vat wexto ke ameyê Mîlas, şikdar vato ke ganî ti bidê çûçike ro û vat: "Mi vat ez nêeşkena çîyêk winasî bikera. Vat, ‘ez remena ti bide mi ro, ti nêdê mi ro ti do biremê ez o bidî to ro.' Tersan ra mi hîrê rojî kesî ra nêvat. Ez keye de bermaya. Mi keye ra nêvat. Ez hîrê rojan keye ra nêvejîyaya. Dima ra mi embazêk xo ra vat."

 

‘Mi nê tehdîdî kesê bînan ra zî eşnawit'

 

Duyguye dewam de wina vat: "Dimayê serrêke ra dima, serê rayîr de boydayîş de ez bi şikdarî dir ameya rî bi rî. Cinîyêke bîne mi nas kerdêne, vat şikdar cinîyanê bînan zî tacîz û tehdîd keno. Mi kesê bînan ra eşnawit ke cinîyê bînan rê zî wina keno. Dima ra ez şîya dozgerîye. Mi gerre kerd la netîceyêk çin o. Nêzana sewbîna yew gerre kerdo yan ney."

 

'Ganî Pêkerdişê Stenbolî bi ca bîyarê'

 

Duyguye tewr peyîn vat, ganî cinî vera şîdet û tacîzî bi cesaret têbigeyrê û vat: "Embaza min Bensu Narli hetê camêrdêk ra ameye qetilkerdene. Wa cinî bi cesaret bê. Wa derûdorê xo ra vajê. Wexto ke nêvajê nêeşkenê keye ra zî vejîyê. Ganî Pêkerdişê Stenbolî zî bi ca bîyarê. Ganî cinî bi no hawa nêrê kiştene."