STENBOL - Keye, wasî û avûkatê Rayberê PKKyî Abdullah Ocalanî, semedê pêvînayîş bikerê, muracatê Serdozgerîya Komare ya Bûrsayî kerdî.

 

Avûkatanê Rayberê PKKyî Abdullah Ocalanî ke Zîndanê Îmraliyî yê Asayîşê Berzî yê Tîpê F de maneno, Mazlûm Dînç, Îbrahîm Bîlmez, Newroz Ûysal û Serbay Koklu semedo ke muwekîlê xo dir roja dişeme pêvînayîş bikerê, muracatê Serdozgerîya Komare ya Bûrsayî kerdî.

 

Muracatê semedê roşane 

 

Birayê Abdullan Ocalanî, Mehmet Ocalan û wasîyê ci Mazlûm Dînç, birayê Omer Hayrî Konarî, Alî Konar, birayê Hamîlî Yildirimî Polat Yildirim û waya Veysî Aktaşî, Melîha Çetîn bi rayîrê avûkatanê xo semedê 13-14-15ê Gulane pêvînayîş bikerê, muracat kerdî.

 

Cewabê muracat nîno dayene 

 

23yê Êlule de bi sebebê “xerîteya rayîrî" ke serra 2019ine de sey îlaweyê pawitişî xo Dadgeha Heqê Merdiman ê Ewropayî (DMME) rê erşawitê, semedê 6 mengan qerarê qedexeyê avûkatan dabî Ocalan û 3 tepişteyê verê ey de. Pêwa ke qedexeyê pêvînayîşî 23yê Adare de qedîya zî, muracatê avûkatan rê ne pozîtîf n ezî negatîf cewab nîno dayene.

 

Avûkatê Abdullah Ocalan, Rezan Sarica û Newroz Ûysal, dimayê 8 serran 2-22yê Gulane, 12-18ê Hezîrane û 7ê Tebaxa 2019ine de pêvînayîş bi muwekîlê xo dir kerdibî.

 

Pêvînayîş nîme de ame birnayene

 

Tewr peyîn semedê îdiayê serê hesabê medyaya dîjîtalî yê derheqê Ocalanî de amebî vatene, endîşeyê raya umumî pîl bibi û 25ê Adare de birayê Abdullah Ocalanî, Mehmet Ocalan ci dir bi rayîrê telefonî qisey kerdibi. La Mehmet Ocalanî neql kerdibi ke qiseykerdişê telefonî nîme de ameyo birnayene.

 

Abdullah Ocalan ke 22 serrî yo Zîndanê Îmraliyî yê Asayîşê Berzî yê Tîpê F de binê tecrîdêko girankerde de tepişte yo, reya ewil 27ê Nîsana 2020 de bi telefon bi birayê xo Mehmet Ocalanî dir qisey kerdibi.